Pavlodarda turatyn oqýshysy 5 tilde sóıleıdi
Qaladaǵy daryndy balalarǵa arnalǵan Abaı atyndaǵy gımnazııanyń 8-synyp oqýshysy Zada Aıala qazaq, orys, aǵylshyn, nemis, qytaı tilderinde sóıleı alady.
Sonymen qatar ol fortepıanoda jaqsy oınap, lıngvıstıkalyq ınterferentsııanyń eki shet tilin úırenýdegi konstrýktıvti jáne destrýktıvti jaqtaryna arnalǵan ǵylymı joba jazyp júr. Daryndy qyzdyń til úırenýge degen qyzyǵýshylyǵy kishkentaı kezinen bastap oıanǵan.
« Qazir jastar kóp tildi bilýi kerek. Bilimdi bolsań ǵana maqsatyńa jetesiń, týǵan elińdi álemge tanyta alasyń. Anam aǵylshyn tili páninen stýdentterge sabaq beredi, ákem sport salasynda. Keıde otbasymyzda anammen aǵylshyn tilinde de sóılesemiz. Qazir nemis tilinen olımpıadaǵa daıyndalyp júrmin. Álemde aǵylshyn, qytaı tilderinde sóıleýshilerdiń sany artýda. Sondyqtan osy tilderdi meńgerip ǵana qoımaı ári zertteý kerek»,- deıdi Zada Aıala.
Talantty shákirt kóp tildi úırený qıyn degen pikirmen kelispeıdi.
« Eger aldyńa maqsat qoısań ol maqsatyń jolynda barlyq kedergilerdi jeńe bilýiń kerek. Este saqtaý qabiletiń arttyrý úshin arnaıy jattyǵýlar jasaýǵa keńes beremin.Tildi úırenýdiń joly kóp. Ózim oqý ortalyqtaryna baryp ǵana qoımaı, túrli tilderde fılm kórip, án tyńdaǵandy unatamyn. Internette til úırenýshilerge arnalǵan túrli onlaın sabaqtar da bar. Qytaı tili - qıyn tilderdiń biri. Sondyqtan qytaı tilimdi qazirgi tańda tereńirek úırenip júrmin. Otbasymyzda ápkem Alýa da tórt tildi biledi», - deıdi ol.
Daryndy shákirttiń ustazy Shamshyraq Qydyrbaevanyń aıtýynsha, Aıala 7-synypta oqı júrip, 9-synyptyń atynan olımpıadaǵa qatysyp júldeli 3-orynǵa ıe bolǵan.
«Otyz jyldan beri bilim salasynda jumys isteımin. Osy ýaqyt aralyǵynda qanshama myqty shákirtterdi daıyndap shyǵardyq. Aıala sekildi talantty shákirttermen jumys jasaý bala tárbıeleýge jiger beredi. Onyń boıyndaǵy ómirge degen qushtarlyq, jańa nárseni uǵynýǵa talpyný ár balaǵa úlgi bolýy kerek», - deıdi Shamshyraq Bekenovna.