Pavlodarda túngi ýaqytta kórshilerdiń mazasyn alǵan jastardyń ata-analary jazalandy
PAVLODAR. KAZINFORM- Olardyń barlyǵy mekteptiń joǵary synyptarynda jáne kolledjderde oqıdy. Qurby-qurdastar páter jaldap, týǵan kún ıesi dastarhan jaıǵan.
Bul týraly oblystyq polıtsııa departamentiniń baspasóz qyzmetinen habarlady.
Jergilikti polıtsııaǵa túngi saǵat 01.00 shamasynda páterlerdiń birinde jastardyń shýlap, mýzyka qoıyp jatqany jaıynda aqparat túsken.
«Shaqyrtý boıynsha mekenjaıǵa barǵa polıtsııa qyzmetkerleri kámeletke tolmaǵan jastardyń páter jaldap, sol jerde dosynyń týǵan kúnin atap ótkenin anyqtady. Bozbalalar men boıjetkender alkogoldi ishimdik iship, sonyń qyzýymen shýlaǵan. Olardyń barlyǵy polıtsııa bólimine jetkizildi. 18 jasqa tolmaǵan azamattardyń qoǵamdyq orynda mas kúıinde bolǵany úshin ata-analaryna qatysty hattama toltyrylyp, aıyppul salyndy», dedi Pavlodar qalalyq soltústik polıtsııa bólimi ıývenaldy polıtsııanyń aǵa ınspektory Irına Emtsova.
