Pavlodarda týberkýlezge shaldyǵý deńgeıi tómendedi
PAVLODAR. QazAqparat - Pavlodar oblysynda 2019 jyly týberkýlezdi emdeýge jáne saýyqtyrýǵa eki mıllıard teńgeden astam qarjy bólindi, dep habarlaıdy QazAqparat tilshisi.
«Pavlodar oblysynda týberkýlezge shaldyǵý kórsetkishi 4,4 protsentke, ólim-jitim - 18,7 protsentke, aýrýdyń qaıtalanýy 12,5 protsentke tómendedi. Óńirde 792 adam belsendi týberkýlezben dıspanserlik esepte tur. Bıyl bul dıagnoz 60 naýqasqa alǵash ret qoıylyp otyr. Osy jyly ony emdeýge jáne saýyqtyrýǵa eki mıllıard teńgeden astam qarjy bólindi. Onyń ishinde 320 mıllıony - dárilermen qamtamasyz etýge jumsalady. Qazirgi tarıf boıynsha bir naýqasqa aıyna 220 215 teńge bólinedi», - dep habarlady «Medıtsınalyq saqtandyrý qory» UAQ Pavlodar oblystyq bólimshesiniń dırektory Aıdar Seıitqazın.
Dárigerlerdiń aıtýynsha, týberkýlezge shaldyqqandardy anyqtaý qıyn. Sebebi, azamattar jeke jáne qoǵamdyq densaýlyqqa jaýapkershilikpen qaramaıdy. Týberkýlezdi der kezinde anyqtap, em alsa, odan tolyqtaı jazylýǵa bolady. Kóptegen azamattar dárigerge týberkýlezge shaldyǵyp qoıǵannan keıin qaralady.
«Ádette, týberkýlez júre-bara baıqalady. Sondyqtan, alǵashqyda týberkýlezdiń belgileri baıqalmaıda, biraq keıin naýqasta mynadaı belgiler paıda bolady: únemi jótelip, keıde qaqyryq pen qan aralas qaqyryq bolady, keýde tusy aýyryp, ózin jaısyz sezinedi, salmaq joǵaltady, qyzýy kóteriledi. Eger osyndaı belgiler bolǵan kezde, tekserilýden ótý úshin mindetti túrde emhanaǵa barý kerek», - dep atap ótti Pavlodar oblystyq týberkýlezge qarsy dıspanserdiń uıymdastyrý-ádisteme bóliminiń meńgerýshisi Zýlfııa Aleýshınova.
2019 jyly Qazaqstanda týberkýlezdi emdeýge jáne oǵan shaldyqqandarǵa áleýmettik kómek kórsetý úshin memlekettik bıýdjetten 47,7 mlrd teńge bólingen, dep atap ótti «Áleýmettik medıtsınalyq saqtandyrý qory» UAQ Pavlodar oblystyq bólimshesinde.
