Pavlodarda trassadaǵy qar bógeıtin qalqandardy kóbeıtý kózdelip otyr
PAVLODAR. KAZINFORM — Respýblıkalyq joldardaǵy qar ustaıtyn ýchaskelerge mańyz berilýde. Ol úshin jaýapty kompanııa aǵash qalqandardyń sanyn kóbeıtedi.
Pavlodar oblysy — elimiziń ortalyǵyn shyǵys óńirlermen jáne Reseımen baılanystyratyn tranzıttik dáliz. Jer bederiniń jazyq bolýy sebepti qysta jel úp etse, qarly boran soǵyp qoıa beredi. Sondyqtan qysta qar basatyn ýchaskelerdi turaqty baqylap, jol tazartý jumysyn muqııat uıymdastyrý óńirdegi merdiger kompanııalarǵa syn.
Qysta eń jıi jabylatyn jol — elordaǵa aparatyn avtoban. Boran soqsa, kóktaıǵaq paıda bolsa avtoban jabylýǵa daıyn turady. Arqaǵa bet qaratpaıtyn aıaz ben kóz ashtyrmaıtyn boran áli jetip úlgergen joq.
Biraq byltyr qarasha aıynyń ózinde atalǵan jol aýa raıyna baılanysty birneshe ret jabyldy. Bul másele bıyl da týyndaýy múmkin.
Atalǵan jolmen turaqty júretin kólik júrgizýshilerdiń oıynsha, jol tazalaýmen aınalysatyn kompanııanyń qysta joldy tazalaýǵa, kóktaıǵaqqa qarsy materıaldy shashýǵa áleýeti jetkiliksiz.
Al «QazAvtoJol» AQ Pavlodar oblystyq fılıalynyń dereginshe, respýblıkalyq mańyzy bar avtojoldardy qysqy ýaqytta kútip ustaýǵa bıyl aıryqsha kóńil bólinip otyr.
Respýblıkalyq avtojoldardyń jalpy uzyndyǵy — 1663 shaqyrym. Joldarǵa qyzmet kórsetýge bıyl 5,75 mlrd teńge bólingen.
— Jumysty atqarýǵa 317 adam, 107 tehnıkamyz bar. Onyń ishinde shnekorotor - 9, KDM - 49, avtogreıderler-15 birlik, traktorlar (K-700, MTZ jáne t. b.) — 26, býldozerler - 3, tıegishter — 9. Qosymsha mamandandyrylǵan 31 tehnıka, aspaly jabdyǵy bar 6 traktor satyp alýǵa konkýrstyq rásimder júrgizilip jatyr, — dep habarlady kompanııanyń óńirlik fılıalynyń dırektory Ermurat Nurhanov.
Fılıal «KAJservıs» POF JShS qyzmet kórsetý uıymymen birlesip aldaǵy qysqy kezeńde avtomobıl joldaryn kútip ustaýǵa qatysty is-sharalar josparyn ázirlegen.
Ári uıymdastyrý máselelerin sheshý jáne barlyq bólimshelerdiń is-qımyldaryn úılestirý úshin jedel shtabtar men jumys shtabtaryn qurǵan.
— Qar basatyn ýchaskelerdiń máselesine basa mańyz berip otyrmyz. Qar ustap qalatyn jerler boıynsha arnaıy jol kartasy ázirlenip, jalpy uzyndyǵy 2210 shaqyrym qar ustaıtyn transheıalar men bilikter, 4908 metr qalqan ornatý kózdelgen. Qazirgi kúni jol boıynda qar ustaýǵa arnalǵan 29 myń metrden astam temirbetondy qorshaýlar bar. Olardyń keıbiri jańartylyp, sıgnaldyq baǵanalar ornatyldy. Budan bólek, joldar aınalasyndaǵy butalar men shópterdi, aǵashtardy shabý, joldaǵy shuńqyrlardy jóndeý sııaqty jumystar atraqylyp jatyr, — dep qosty ol.
Aldaǵy qysta kóktaıǵaqqa qarsy sebý úshin 11 myń tekshe metrden astam qum, 4 myń tonnadan astam tuz daıyndalǵan. Avtojoldardyń boıynda 10 jylytý pýnkti jumys isteıdi.
Eske sala keteıik, Astana — Pavlodar avtobanynyń jyrǵa aınalǵan bóligi jóndeletin boldy.