Pavlodarda tramvaı astynda qalyp qoıǵan eki qyzdyń biri oqıǵa ornynda kóz jumdy
PAVLODAR. QazAqparat - Pavlodar qalasynyń Kýtýzov kóshesinde adam ólimine ákep soqqan jol kólik oqıǵasy tirkeldi, dep habarlaıdy «QazAqparat» HAA tilshisi.
«Pavlodar qalasynyń tramvaı basqarmasy»AQ baspasóz hatshysy Tımofeı Golevtiń aıtýynsha, jol kóligi apaty búgin tańerteń 7.42-de bolǵan. Kýtýzov kóshesiniń boıymen qozǵalyp kele jatqan tramvaı jaıaý júrginshiler jolaǵy janyndaǵy «Aımaýytov teatry» aıaldamasynyń aldynda jol kóligi apatyna ushyrady. Tramvaıdy 1987 jylǵy qyz basqarǵan. Eńbek tájirıbesi - 5 jyl.
Densaýlyq saqtaý basqarmasy baspasóz qyzmetiniń málimetinshe, 2007 jáne 2009 jylǵy eki mektep oqýshysy tramvaı astyna túsip qalǵan. 10 jastaǵy qyz aýyr jaraqat alýy saldarynan oqıǵa ornynda kóz jumdy. 8 jastaǵy ekinshi qyz oblystyq balalar aýrýhanasynyń jan saqtaý bólimshesine jetkizildi. Ony neırohırýrg, travmatolog, reanımatolog mamandar qarap jatyr.
«Jaǵdaıy aýyr, qatty soqqy alǵan. Tańerteń saǵat 8.10-da jekizildi», - dep habarlady vedomstvo.
