Pavlodarda traktor qurastyrylady
PAVLODAR. QazAqparat - «KSW Agrotech» JShS qytaılyq seriktesi – «Wan E» kompanııasymen birlesip aýyl sharýashylyǵy tehnıkasyn qurastyrýdy qolǵa almaq, dep habarlaıdy QazAqparat Pavlodar oblysy ákiminiń baspasóz qyzmetine silteme jasap.
Pavlodardaǵy «Investorlar úıinde» kelisimshartqa qol qoıý rásimine Pavlodar oblysy ákiminiń orynbasary Arystan Qabykenov qatysty. Traktor Pavlodardyń burynǵy avtobazasynda qurastyrylady. Taıaýda kásiporynǵa Qytaıdan qurastyrý jelisi jetkiziledi. Qýattylyǵy 300 attyń kúshine teń keletin tehnıkanyń alǵashqy legin 2020 jyldyń kúzgi jıyn-terim jumystaryna deıin kópshilikke tanystyrý josparlanǵan.
«Bul jobany úsh kezeńge bólip, júzege asyrýdy josparlap otyrmyz. Qazirgi bazanyń qoldanystaǵy ınfraqurylymyn paıdalana otyryp, jylyna 3 000 traktor qurastyrý qolǵa alynady. Jańadan 50 jumys orny qurylady. Eger bári jospar boıynsha júretin bolsa, 2021 jyly «Pavlodar» arnaıy ekonomıkalyq aımaǵynyń aýmaǵynan áldeqaıda úlken kásiporyn salýdy bastaımyz. Tıisinshe, 150 jumys orny ashylatyn bolady. Bul kásiporynnyń qýattylyǵy jylyna 30 myń tehnıka qurastyrýǵa deıin jetpek. Bolashaqta atalǵan óndiristi Pavlodar oblysynda birjola damytyp, metall buıymdary men aýyl sharýashylyǵy tehnıkalaryna arnalǵan bólshekterdi shyǵarmaqpyz», – deıdi «KSW Agrotech» JShS bas dırektory Rústem Ibragımov.
Investorlardyń sózinshe, olardyń traktorlary tek Qazaqstanda ǵana emes, jaqyn shet memleketterde de suranysqa ıe bolýy kerek. Olardyń basty artyqshylyǵy – baǵasynda. Pavlodarlyq traktordyń quny shamamen 130-150 myń dollar bolady. Al dál osyndaı amerıkalyq, eýropalyq tehnıkalar 500-700 myń dollar turady. Onyń ústine kásiporyn óz traktorlaryn lızıngke berýge jáne aýyl sharýashylyǵy ónimderine aıyrbastaýǵa ázir.
