Pavlodarda tórt jasar balǵyndar shahmattan synǵa tústi
ASTANA. QazAqparat - Pavlodarda № 2 balalar men jasóspirimder sport mektebiniń bazasyndaǵy «Shahmat úıinde» mektep jasyna deıingi balǵyndar arasynda jedel shahmattan baıqaý ótti, dep habarlaıdy pavlodarnews.kz.
Oblystyq bilim berý basqarmasynyń málimetinshe, jarys shveıtsarlyq tásil boıynsha alty kezeńnen uıymdastyrylǵan. Bir kezeńde eki oıynshynyń árbirine 15 mınýttan berildi. Jyldam oılaýǵa jáne tez sheshim qabyldaýǵa baýlıtyn baıqaýǵa qatysqan 29 balanyń arasynda eń jasy kishi qatysýshylar tórt jastaǵy Jasmın Tekjanova, Ánýar Ahmetov jáne Ańsar Ospanov boldy.
Búldirshinderdiń oıynyna № 2 balalar men jasóspirimder mektebiniń bas tóreshisi Shárip Kákenov baǵa berdi. Sharanyń qorytyndysy boıynsha birinshi oryndy Danıel Shormanov pen Jasmın Tekjanova, ekinshi oryndy Álıjan Smaılov pen Arına Kostenko, úshinshi oryndy Asanálı Murat pen Ramına Sadyqova ıe boldy. Olarǵa arnaıy sertıfıkattar men medaldar tabys etildi.
