Pavlodarda tórt úı órtendi
PAVLODAR. QazAqparat - Keshe, jeksenbi kúni oblys ortalyǵyndaǵy saıajaı aýmaǵynda tórt úı otqa orandy, dep habarlaıdy pavlodarnews.kz.
Oblystyq TJD basqarmasy baspasóz qyzmetiniń málimetinshe, Sosnovaıa kóshesi, 158 mekenjaıy boıynsha «Entýzıast» baǵbanshylyǵynda saǵat 15.20-da órt shyqqany tirkelip, saǵat 17.45-te sóndirilgen. - Kirpish úıdiń alty sharshy metr aýmaǵynda aǵash qurylymdar men tóbesi janǵan. Qazirgi tańda úıdiń ıesi anyqtalýda. Sondaı-aq, Sosnovaıa kóshesi, 160 mekenjaıy boıynsha 15 sharshy metr aýmaqta aǵash úı tolyǵymen janyp ketken jáne aǵash qorshaýlardy órt shalǵan, - dedi departamentte.
Budan basqa, Vınogradnaıa kóshesi, 123 mekenjaıy boıynsha saıajaı ýchaskesinde úıdiń 12 sharshy metr aýmaǵynda aǵash qurylymdar janyp, tóbesiniń bir bóligi opyrylyp túsken. Vınogradnaıa kóshesi, 125 mekenjaıy boıynsha tilsiz jaý 15 sharshy metr aǵash úıdi tolyǵymen jalmap ótken. Órttiń shyǵý sebebi men keltirilgen shyǵyn kólemi anyqtalýda.
Qyzyl jalyndy aýyzdyqtaýǵa № 2 órt sóndirý bóliminiń jeke quramynan jáne bólimshesinen jeti adam men úsh avtotsısterna jumyldyryldy. 8 sáýirge qaraǵan túni saǵat 01.20-da kezekshilik bólimine Ekibastuz qalasynda Karagandınskaıa kóshesi, 21 mekenjaıy boıynsha shlaktan quıylǵan úıdiń janyp jatqany týraly habarlama túsken. Iesiz turǵan úsh bólmedi úıdiń 70 sharshy metr aýmaǵynda aǵash qurylymdar men dýaldary janǵan. Úı ıesi anyqtalýda. Aldyn ala boljam boıynsha, órttiń shyǵýyna otty abaısyz qoldaný sebep bolǵan. Keltirilgen shyǵyn kólemi anyqtalýda. Oqıǵa ornynda № 32 órt sóndirý bóliminiń jeke quramynan jumys istegen tórt adam men bir avtotsısterna órtti saǵat 3.52-de sóndirdi.
