Pavlodarda tórt túlikti tasymaldaý erejelerin buzǵan 8 azamat aıyppul arqalady
PAVLODAR. KAZINFORM - Ertis boıynyń tártip saqshylary mal urlyǵynyń aldyn alý, tórt túlikti tasymaldaý zańdylyqtarynyń saqtalýy boıynsha reıdtik is-shara ótkizip jatyr.
Bul týraly óńirlik polıtsııa departamentiniń baspasóz qyzmetinen habarlady.
- Mal urlyǵyna qatysy bar azamattardy anyqtap, ustaý jáne jaýapkershilikke tartý maqsatynda oblys aýmaǵynda «Mal urlaýshy» respýblıkalyq is-sharasy ótkizilýde. Tek alǵashqy táýlikte mal men et ónimderin tasymaldaıtyn 111 avtokólik, et satatyn 64 oryn jáne 144 sharýa qojalyǵy tekserildi. Tekserý nátıjesinde aýyl sharýashylyǵy janýarlaryn tasymaldaý erejelerin buzǵany úshin segiz azamat jaýapqa tartyldy. Sondaı-aq mal jaıý erejelerin buzǵany úshin 13 mal ıesi jazalandy,- dep málimdedi polıtsııa departamentinen.
Qazir tártip saqshylary mal urlyǵynyń aldyn alýdy kúsheıtip, tekserýler júrgizip qana qoımaı, túsindirý jumystaryn da júzege asyrýda. Kúsheıtilgen reıdter 31 naýryzǵa deıin jalǵasady.
Eske sala keteıik, Pavlodar oblysy polıtsııa departamentiniń uıymdasqan qylmysqa qarsy kúres basqarmasy Alıýmınıı zaýyty aýmaǵynan metall urlaý shemasyn anyqtady.