Pavlodarda tórt muz ótkeli jumys istep tur
PAVLODAR. KAZINFORM — Óńirdegi muz joldary negizinen mal azyǵy men otyn tasý úshin paıdalanylady. Ázirshe ótkelder Aqqýly jáne Tereńkól aýdandarynda ǵana ashylǵan.
Ertis ózenindegi muz ótkelderiniń tórteýi ǵana resmı túrde ashylǵan. Qalǵany muzdyń juqalyǵyna jáne tıisti ruqsattyń alynbaýyna baılanysty jabyq tur.
— Qazirgi ýaqytta Aqqýly aýdanynyń ıAmyshev, Tereńkól aýdanynyń Tereńkól, Peschan, Beregovoe aýyldary mańyndaǵy muz ótkelderi tolyqtaı jabdyqtalyp, qyzmet kórsetip tur. Búginnen bastap Pavlodar aýdanynyń Jańaqala aýyly mańyndaǵy muz joly jabyldy. Al Maı aýdanynda aldaǵy kúnderi bir muz ótkeli ashylady dep josparlanǵan. Qalǵan ótkelder aýa raıyna, muzdyń qalyńdyǵyna jáne aýyl halqynyń qajettiligine baılanysty ashylady, — dep habarlady Kazinform tilshisine óńirlik tótenshe jaǵdaılar departamenti azamattyq qorǵanys basqarmasynyń ofıtseri Temirlan Japalbaı.
Іshki ister mınıstrliginiń 2015 jylǵy 19 qańtardaǵy № 34 buıryǵyna sáıkes, muzdyń qalyńdyǵy 25 santımetrden assa, avtokólikterdiń ótýine, 10 santımetrden assa, jaıaý adamnyń júrýine ruqsat beriledi.
Biraq buıryqta ótkelderden túsetin jerlerde eki jaqtan da ornatylǵan qalqandarda arnaıy qysqy qural-jabdyqtar (ilgekter, satylar, qutqarý sheńberleri, bóreneler) qoıylýy kerektigi eskertilgen.
Buǵan qosa kireberisterde ótkeldiń ataýy, jumys ýaqyty jáne ony qurý men ustaýǵa jaýaptylardyń derekteri kórsetilgen mańdaıshalar ornatylady. Ári ol jerdegi muzdyń qalyńdyǵy kúnine 2 ret ólshenýi tıis.
«Qazgıdromet» RMK Pavlodar fılıalynyń aqparynsha, Ertis ózenindegi gıdrologııalyq beketterde muzdyń qalyńdyǵy 40-tan 58 santımetrge deıin jetip tur. Mamandar muzdyń qalyńdyǵy ótken jyldyń deńgeıinde ekenin aıtady.
Al Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasynyń ókilderi ózenge sý jiberýdiń táýliktik normasy saqtalyp turǵanyn habarlady.
Mamandardyń sózinshe, Shyǵys Qazaqstan men Abaı oblystaryndaǵy sý qoımalarynan Ertis ózenine sý jiberý qysqy ýaqytta da jalǵasa beredi. Ózenniń tómengi aǵysynda ornalasqan bizdiń óńir úshin bul asa mańyzdy.
— Shúlbi sý qoımasynan ortasha eseppen sekýndyna 650 tekshe metr sý jiberilip jatyr, ol ádettegi normaǵa sáıkes keledi. Al Buqtyrmadan sý jiberý kóleminiń maýsymdyq normasy 500 tekshe metr bolsa, qazir ol 650 tekshe metrge deıin ulǵaıtylǵan. Bul Shúlbidegi sý deńgeıin ustap turýmen baılanysty bolyp otyr. Ózendegi sý kóleminiń kúrt artýyna nemese kemip ketýine Shúlbi sý qoımasy erekshe áser etedi. Ondaǵy sýdyń deńgeıi shamamen Baltyq teńizi deńgeıinen 239-240 metrde ustalady. Bul qaýipsiz deńgeı. Deńgeı 241-242 metrge deıin ósse, ol qaýipti degen sóz. Búginde barlyq kórsetkish qalypty deńgeıdi kórsetip otyr. Ertis ózeninde sý deńgeıiniń ulǵaıýy kútilmeıdi. Muz ótkelderine eshqandaı qaýip joq, — deıdi «Ertis» basseındik ınspektsııasy basshysynyń orynbasary Eleýsiz Qambarov.
Byltyrǵy jeltoqsan aıynda Ertis ózeninde muz qabaty meılinshe juqa bolýyna baılanysty muz ótkelderi ashylmaı otyrǵanyn jazǵanbyz.