Pavlodarda tórt kolledj dıplom kóshirmesin satyp kelgen
ASTANA. QazAqparat - Pavlodar oblysynda tehnıkalyq jáne kásibı bilim beretin tórt mekemede dıplomnyń kóshirmesi úshin 500 teńgeden bastap, 3000 teńgege deıin talap etken, dep habarlaıdy pavlodarnews.kz.
«Tehnıkalyq jáne kásibı bilim berý qujattarynyń kóshirmesin berýdi aqyly túrde júzege asyrý zańsyz bolyp tabylady, - dedi Memlekettik qyzmet isteri jáne sybaılas jemqorlyqqa qarsy is-qımyl agenttigi Pavlodar oblysy boıynsha departamentiniń memlekettik qyzmetter basqarmasynyń bas mamany Anelııa Kaır. - Memlekettik nemese jeke menshiktegi kolledj ekenine qaramastan, 2015 jyldan beri mundaı qyzmetter tegin kórsetilip keledi».
Eń qymbat kóshirmeler Innovatsııalyq Eýrazııa ýnıversıtetiniń kolledjinde - úsh myń teńge. Bul jerde ótken jyly 22 qujat «satyp» úlgergen. Ol qarajatty oqý ordasy 2018 jyldyń 1 maýsymyna deıin qaıtarady.
Eń tómen baǵany J.Musa atyndaǵy Aqsý memlekettik kolledjinde suraǵan - 592 teńge. Bul qyzmetke 57 adam júgingen. 34 qyzmetti paıdalanýshyǵa óz aqshalary qaıtaryldy. Qalǵandaryna 2018 jyldyń 1 mamyryna deıin keri beriledi.
«QaztutynýOdaǵy» Pavlodar ekonomıkalyq kolledjinde úsh aıdyń ishinde 18 adamǵa qarajaty qaıtarylmaq. Taǵy 10 adam óz aqshalaryn Pavlodar polıtehnıkalyq joǵary kolledjinen alady.
Sonymen qatar, TjKB mekemelerinde dıplomnyń kóshirmesin berý ýaqyty 20 kúndi quraǵan. Ol úshin bar-joǵy jeke kýálik pen ótinish berý jetkilikti bolǵan.
Anelııa Kaırdiń aıtýynsha, departamenttiń uıǵarýymen bilim basqarmasynyń kolledjderi 108 qyzmet paıdalanýshyǵa 100 myń teńgeden astam qarjy qaıtarady.
Pavlodar oblysynda barlyǵy 50 kolledj jumys jasaıdy. Onyń 16-sy - jekemenshik.
