Pavlodarda toqyraý jyldary 5 myń kitapty saqtap qalǵan kitaphanashy turady

Grıgorevka aýyldyq okrýgindegi kitaphananyń qyzmetkeri Raýshan Jampeıisova joǵary sanatty maman. Shırek ǵasyrdan asa ýaqyt tapjylmaı bir orynda jumysyn tyńǵylyqty atqaryp kele jatqan ol joqtan bar jasap, kitaphana jumysyn jandandyryp otyr. Túrli úıirmeler óz aldyna, ár ataýly kúnge, merekege oraı is-sharalar uıymdastyryp, jan-jaqtan jıǵan-tergen aqparattaryn tsıfrlandyrýmen shuǵyldanady.

Jergilikti ustaz, mýzeı qyzmetkeri bolǵan Dýdan Ysqaqovamen birlesip, kitaphana janynan tipti murajaı da ashyp qoıǵan.

Bala kúninen kitap oqyǵandy unatqan Raýshan ózi týyp-ósken Dostyq eldi mekenindegi klýb ishindegi shaǵyn kitaphanadan shyqpaıtyn. Ákesi Rahmetolla da belsendi oqyrman edi. Jergilikti kitaphanashy zeınetkerlikke taıaǵan jan eken. Osyny eskergen ákesi mektep bitirgen Raýshandy kitaphanashy oqýyna túsiredi. Medıtsına mamandyǵyn ıgeremin dep júrgen qarshadaı qyz alǵashqyda ákesiniń bul sheshimine ań-tań bolyp, oqýǵa zaýqy soqpaı júredi. Deıturǵanmen zeıindi jas az ýaqytta bul salanyń da qyr-syryn uǵyna bastady. Dıplomyn qolyna alǵan soń birden týǵan aýylyna baryp, kitaphana isine aralasyp ketedi. Arada eki jyl ótkende Naberejnoe aýylyna kelin bolyp túsedi.

– Toqsanynshy jyldardaǵy toqyraý kezeńinde aýyldardaǵy barlyq derlik áleýmettik mekeme jumysyn toqtatyp, jaǵdaı qıyndaı tústi. Keıin zaman túzelgende sol kezdegi aýyldyq okrýg ákimi Toqtasyn Antaıulyna toqyraý jyldary saqtap qalǵan 5 myń kitaptyń baryn aıtyp edim. Ol birden ákimshilikten bir bólmesin bosatyp, maǵan kitaphanashylyq isti tapsyrdy. Osylaısha jumysymyz qaıta jandandy, - dep eske alady kezindegi qıyn kezeńderdi Raýshan Rahmetollaqyzy.

Naberejnoe aýyldyq kitaphanasyna 2006 jyly «Úlgili kitaphana» mártebesi berilip, qajetti jıhazdarmen qamtamasyz etiledi. «RABIS» baǵdarlamasy boıynsha jumys istele bastaıdy. Al 2008 jyly mundaǵy mádenıet úıi qaıta jańǵyryp, kitaphana da jańa ǵımaratqa kóshedi. Kóship-qonyp júrgende de Raýshan Rahmetollaqyzy kitaptarǵa muqııat qaraǵan. Aýyl tarıhy, mádenıeti, bilim, ekonomıka salalaryna qatysty jyldar boıy jınaǵan málimetter murajaıǵa qoıylyp qana qoımaı, tsıfrlandyrylyp, «Meniń aýylym» elektrondy katalogyna da engizilgen. Bolashaqta demeýshiler tabylyp jatsa, kitap bolyp basylyp shyqpaqshy.

Osydan úsh jyl buryn kitaphana kúrdeli jóndeýden ótip, barlyq jıhazdary jańartylypty. Tórde – qazaqtyń kıiz úıi, árbiriniń óz tarıhy bar kónede paıdalanylǵan qural-jabdyqtar, t.b. zattar sonaý erte zamannyń lebin kelýshilerge jetkizip turǵan. Aýyldyń órkendeýine zor úles qosyp ketken jandar, soǵys ardagerleri, tyl eńbekkerleri, kóp balaly analar, eńbek ardagerleri, elimizge tanymal aýyl týmalary jaıly málimetter, bári-bári tirnektep jınalǵan dúnıeler. Mundaǵy «Atamura» klýbynyń ájeleri jastarǵa salt-dástúrlerimizdi nasıhattasa, «Aqqý» klýbynda oqýshylarmen túrli oıý-órnekterimiz jasalyp, maǵynasy, shyǵý tarıhy túsindiriledi.

Raýshan Rahmetollaqyzy áriptesteriniń arasynda zor qurmetke ıe. Óz tájirıbesin jastarmen bólisip otyrady. Qoǵamdyq jumystarǵa da belsene atsalysyp keledi. Ol jergilikti analar keńesiniń tóraıymy.

Joldasy Erlan ekeýi Aısha, Arnagúl esimdi qyzdardy tárbıelep ósirip, árqaısyn qııaǵa qondyrdy. Olardan tórt jıen nemere súıip otyr. Aısha anasynyń armanyn oryndap, medıtsına salasyna bet bursa, Arnagúl ustazdyq jolda júr.

Sóz sońynda kitaphanashy: «Ómirime rızamyn. Jumysym ekinshi úıim sııaqty. Kún saıyn jumysqa kádimgideı qýanysh sezimimen baramyn. Mamandyq tańdaýda qalt ketpegenim úshin ákeme de alǵysym zor. Men úshin ár oqyrman kitaphanadan óz izdegenin taýyp, bir aýyz jyly sózin arnasa, odan artyq baqyt joq!» dep atap ótti.

Eske sala keteıik, elimizde bilim berý uıymdarynyń kitaphanalary zamanaýı tsıfrlyq sheshimderge kóship jatyr.