Pavlodarda «Tık-Tok» arqyly jurtty aldap kelgen qylmystyq toptyń joly kesildi
PAVLODAR. KAZINFORM - Pavlodar oblysy kıberqylmysqa qarsy is-qımyl basqarmasynyń qyzmetkerleri áleýmettik jelide «Oncharge» dúkeni atynan jalǵan jarnama jarııalap kelgen qylmystyq topty qolǵa túsirdi.
Kıberqylmysqa qarsy is-qımyl qyzmetkerleri bıylǵy 1 maýsym - 10 shilde aralyǵynda «Tık-Tokta» «Oncharge» dúkeni atynan jarnama jarııalap kelgen qylmystyq topty anyqtaǵan.
- Júrgizilgen jedel-izdestirý is-sharalary barysynda qylmystyq toptyń uıymdastyrýshylary anyqtaldy. Olar - Pavlodar qalasynyń 17 jáne 19 jastaǵy úsh turǵyny. Ustalǵandar uıaly telefondardy satý týraly hat almasýlar júrgizgen. Sondaı-aq, aldanǵan azamattardyń aqshalaı qarajaty aýdarylǵan dropperler de anyqtaldy,- dep habarlady Pavlodar oblysy polıtsııa departamenti kıberqylmysqa qarsy basqarmasynyń bastyǵy Ashat Abetjanov.
Qazirgi ýaqytta atalǵan toptyń áreketinen zardap shekken 18 jábirlenýshi belgili boldy, olar ártúrli oblystarda turady. Ustalǵandarǵa qatysty QR Qylmystyq kodeksiniń «Alaıaqtyq» baby boıynsha is qozǵalyp, sotqa deıingi tergeý júrgizilip jatyr.
Eske sala keteıik eki astanalyq alaıaq 150 adamdy aldap, túrmege qamaldy.