Pavlodarda terrorızmge jáne bılikti basyp alýǵa úndeý kúdigimen 3 adam ustaldy
Onlaın baspasóz máslıhatynda Pavlodar oblystyq Polıtsııa departamenti basshysynyń birinshi orynbasary Jasqaırat Qaıyrov «Qańtar oqıǵasyna» qatysty málimetterdi jarııa etti.
«4 qańtarda áleýmettik jelilerge monıtorıng júrgizý barysynda belgili bir tulǵalar 5 qańtar kúni mıtıng uıymdastyryp, ótkizýge shaqyryp jatqanyn anyqtadyq. 5 qańtar kúni saǵat 14:00-de 1500-den astam adam ortalyq alańǵa keldi. Olardyń uıymdasqany baıqalady. Olar jergilikti atqarýshy organdarǵa óz talaptaryn aıtty. Oblys jáne qala ákimi aldaryna shyǵyp, talaptaryn tyńdady», - dedi Jasqaırat Qaıyrov.
Alaıda, jergilikti atqarýshy organ ókilderi sóılep jatqan kezde oblystyq ákimdik ǵımaratyn kúshpen basyp alýǵa úgittep, aıqaılaǵan daýystar shyǵa bastaǵan.
«Saǵat 17:00 shamasynda olar oblys ákimdigi ǵımaratynyń qorshaýyn buzyp ótip, polıtsııa qyzmetkerlerine tas, taıaq, bótelkeler laqtyrdy. 15 mınýt ishinde ákimdikke kireberis esiktegi metalloplastıkalyq qorǵanysty syndyrdy. Shyny esikterdi syndyrý arqyly ákimdiktiń front ofısine kirdi. Bul kezde ákimdiktiń kire berisinde polıtsııa qyzmetkerleri turǵan bolatyn. Taǵy da qosymsha kúshtiń kelýimen kirgen top yǵystyryldy», - dedi Jasqaırat Qaıyrov.
Jappaı tártipsizdikti boldyrmaý maqsatynda arnaıy jospar qurylyp, ári qaraı Ulttyq ulan áskeri jınalǵandardy Abaı eskertkishine qaraı yǵystyryp, psıhologııalyq áser etý úshin jaryqtyq-shý granatalaryn qoldanǵan. Sodan keıin agressıvti topty Qaıyrbaev – Máshhúr Júsip, Sátbaev – Toraıǵyrov kósheleriniń qıylysyna deıin shegindirý múmkin bolǵan.
«Qaraqshylyqqa jol bermeý úshin polıtsııa kúzetteri saýda úıleriniń mańynda ornalastyryldy. Qarjy operatsııasy úzdiksiz júrip turý maqsatynda bankter men bankomattar kúzetke alyndy, qalalyq jáne aýyldyq jerlerde qolma-qol aqsha bolýy úshin ınkassatorlarǵa ilesip júrý júzege asyryldy», - dedi Jasqaırat Qaıyrov.
Málim etilgendeı, «qańtar oqıǵasy» kezinde arnaıy operatsııanyń birinshi kúni 150 adam ustalyp, olar qosalqy irikteý pýnktine jiberilgen.
«Pavlodar qalasyndaǵy sotqa mıtıngige qatysqandarǵa qatysty 1282 materıaly jiberildi. 324 adam 15 táýlikke deıin qamaýǵa alyndy. Ekibastuz qalasy men Baıanaýyl aýdanynda qoǵamdyq tártipti buzýǵa jol berilgen joq», - dedi J. Qaıyrov.
Jasqaırat Qaıyrovtyń aıtýynsha, Pavlodarda qańtardaǵy mıtıngini uıymdastyrdy degen kúdikpen 3 adam anyqtalǵan. Olarǵa qatysty 2 qylmystyq is qozǵaldy.
«Tergeý júrip jatqandyqtan mán-jaıyn ashyp aıta almaımyn. 3 uıymdastyrýshyǵa qatysty QR QK 255-baby «Terrorızm aktisine» qatysty jáne 179-baby «bılikti basyp alýǵa áreket jasaý jáne soǵan shaqyrý» boıynsha tergeý júrgizilýde», - dedi Jasqaırat Qaıyrov.
Departament basshysynyń birinshi orynbasary mıtıng kezinde eshbir polıtsııa qyzmetkeri jáne kóligi zardap shekpegenin atap ótti.
