Pavlodarda terrorızm týraly jalǵan habar bergen oqýshy anyqtaldy
PAVLODAR. KAZINFORM - 9-synyp oqýshysy ózge bireýdiń telefonyn paıdalanyp, jedel qyzmetke terrorızm aktisi daıyndalyp jatqany týraly jalǵan habar bergen.
Óńirlik polıtsııa departamentiniń málimetinshe, oqıǵa bolǵan kúni jasóspirim sabaqqa keshigip kelgen. Sport zalynda qaraýsyz jatqan synyptasynyń uıaly telefonyn kórip, ázil retinde jedel qyzmetke qońyraý shalýdy uıǵarǵan. Alaıda ol óz áreketiniń saldary týraly oılanbaǵan.
Quqyq qorǵaý organdary qońyraý túsken nómirdi jedel anyqtap, oqıǵanyń mán-jaıyn teksergen.
– Terrorızm aktisi týraly kórineý jalǵan habarlama berý deregi boıynsha qylmystyq is qozǵaldy. Kámeletke tolmaǵan jasóspirim zańdy ókilderiniń kepildigine tapsyryldy, – deıdi Pavlodar qalasy polıtsııa basqarmasynyń bastyǵy Balǵabaı Qaparov.
Tártip saqshylary terrorızm aktisi týraly kórineý jalǵan habarlama berý qylmystyq quqyq buzýshylyq ekenin eskertedi. Bul áreket úshin bes jylǵa deıin bas bostandyǵynan aıyrý jazasy kózdelgen.
- Sonymen qatar jalǵan habarlamaǵa baılanysty jedel qyzmetterdiń áreket etýine jumsalǵan shyǵyndar ótelýge tıis. Bul jaǵdaıda keltirilgen shyǵyndy óndirý máselesi kámeletke tolmaǵan balanyń zańdy ókilderine qatysty qaralady, - dep qosty polıtsııadan.
Eske sala keteıik, dostaryna terrorızmdi nasıhattaǵan aqtóbelik sottaldy.
