Pavlodarda terezeden qulaǵan 7 jáne 2 jasar eki bala mert boldy
PAVLODAR. QazAqparat - Eki jaǵdaıda da balalar úıde ata-analarymen birge bolǵan, dep habarlaıdy QazAqparat Pavlodarnews resýrsyna silteme jasap.
Oblystyq PD baspasóz qyzmetiniń málimetinshe, 2019 jyly týǵan bala besinshi qabatta ornalasqan páterdiń terezesinen qulap ketken.
Basqa jaǵdaıda jeti jasar bala Vs.Ivanov kóshesindegi úıdiń besinshi qabatynda ornalasqan páterdiń terezesinen qulaǵan.
- Eki jaǵdaıda da balalar aýrýhanaǵa jatqyzyldy. Ekeýi de alǵan jaraqatynan qaıtys boldy, - dep habarlady polıtsııa departamenti bastyǵynyń birinshi orynbasary Jasqaırat Qaıyrov.
Polıtsııa ata-analardan balany tipti qysqa merzimge qaraýsyz qaldyrmaýdy, terezelerdi ashyq qaldyrmaýdy, tereze janynda jıhaz qoımaýdy suraıdy.
Sebebi, onyń kómegimen bala tereze aldy taqtaıyna óz betinshe kóterilýi múmkin.
Sondaı-aq balalar terezeni óz betinshe asha almaıtyndaı etip qulyptar men tıekterdi teksergen durys.
