Pavlodarda teplovozdyń astyna túsken azamat kóz jumdy
PAVLODAR.QazAqparat – Qaıǵyly oqıǵa ekinshi Pavlodar yqshamaýdanynda bolǵan, dep habarlaıdy QazAqparat tilshisi.
«Tańǵy saǵat 08:12-de jedel járdem stantsııasyna er adamnyń teplovozdyń astyna túskenin kórgen adamdar habarlasty. Jedel járdem brıgadasy oqıǵa ornyna jeti mınýtta jetti», - dep habarlady Pavlodar oblystyq densaýlyq saqtaý basqarmasynyń baspasóz hatshysy Maqpal Qarjaýbaı tilshilerge.
Onyń aıtýynsha, oqıǵa ornynda qutqarý qyzmeti jumys istegen. Olar deneni teplovozdyń astynan shyǵaryp alǵan.
«Jedel járdem dárigerleri bıologııalyq ólimdi tirkedi. Er azamattyń kelbeti - eýropalyq, jasy shamamen 40-qa tolmaǵan», - dep tolyqtyrdy baspasóz hatshysy.
Qaza tapqan er adamnyń denesi teplovozdan jaraqat almaǵan, sondyqtan ólimniń naqty sebebin saraptama anyqtaıdy.
