Pavlodarda temeki tuqylynyń kesirinen 40 adam ómirmen qoshtasa jazdady
PAVLODAR. QazAqparat - Búgin tańǵy saǵat 4:29-da Pavlodar qalasyndaǵy Lermontov kóshesi, 94 mekenjaıynda ornalasqan bes qabatty turǵyn úıden órt shyqty, dep habarlaıdy pavlodarnews.kz.
Oblystyq TJD baspasóz qyzmetiniń málimetinshe, birinshi qabattaǵy páterdiń 10 sharshy metr aýmaǵy janyp ketken.
«Tún ishinde qutqarýshylar 40 adamdy syrtqa alyp shyqty. Onyń 10-y - bala. Tilsiz jaý saǵat 5:27-de tolyǵymen sóndirildi.
Aldyn ala boljam boıynsha, shylym shegý kezinde salǵyrttyq tanytý keleńsiz jaǵdaıdyń oryn alýyna sebep bolǵan», - deıdi departamentte.
Oqıǵa ornynda jeke quramnan 14 adam men bes tehnıka jumys istedi.
