Pavlodarda telefon arqyly alaıaqtyq jasaýdyń jańa túri paıda boldy
ASTANA. QazAqparat - Pavlodar qalasynyń tártip saqshylary qonaq úılerdiń biriniń ákimshilik telefonyna habarlasyp, ózin «Dmıtrıı Vasılevıchpin» dep tanystyrǵan belgisiz adamǵa izdeý jarııalady. Alaıaq telefon arqyly qonaq úıdiń aspazyn taqyrǵa otyrǵyzyp ketken, dep habarlaıdy «QazAqparat» HAA tilshisi.
Pavlodar oblysynyń ІІD baspasóz qyzmeti telefon arqyly alaıaqtyq jasaýdyń jańa túri paıda bolǵanyn habarlaıdy. Vedomstvonyń resmı málimetine súıensek, Pavlodarda qonaq úılerdiń biriniń ákimshilik telefonyna habarlasyp, ózin «Dmıtrıı Vasılevıchpin» dep tanystyrǵan adam eki nómirdi brondaıtynyn aıtqan. Sóılesý kezinde ol ózi tapsyrys bergen nómirlerge eki bótelke frantsýz konıagin, shampan, jemis pen qymbat konfetterdi qaldyrýyn ótingen.
«Tapsyrysty oryndaý úshin 100 000 teńge kólemindegi aqshamen qonaq úıdiń aspazy sýpermarketke jiberilgen. Dúkende qymbat sýsyndar bolmaı qalyp, bul jaıynda «Dmıtrıı Vasılevıchke» uıaly telefon arqyly habarlanady. Ol osy máseleniń restoran ákimshiligimen sheshilgenin aıtyp, qarjyny (aspazǵa - avt.) «Kıvı koshelek» termınaly arqyly joldaýdy suraıdy. Qarjy joldanǵannan keıin abonenttik nómir sóndirilgen. Osy oraıda belgisiz tulǵa 100 000 teńge kólemindegi qarjyny ıelenip, jábirlenýshilerge polıtsııaǵa aryz berýge týra keldi», - delingen habarlamada.
Atalǵan jaǵdaı boıynsha alaıaqtyq babymen tergeý jumystary bastalǵan. Qylmys jasaýǵa qatysy bar tulǵalardy anyqtaý men ustaýǵa baǵyttalǵan tergeý jáne izdeý is-sharalary júrgizilýde. Polıtsııa turǵyndardy alaıaqtardyń tuzaǵyna ilinbeýge jáne abaı bolýǵa shaqyrady.
