Pavlodarda «Taza Qazaqstan» aktsııasy aıasynda aýyl sharýashylyq jármeńkesi ótti
PAVLODAR. KAZINFORM — Oblys ortalyǵyndaǵy «Jailau» fermerlik bazarynda bul kúni jergilikti óndirýshiler tabıǵı azyq ónimderin satyp qana qoımaı, qaıta óńdeletin qaptamalardy nasıhattady.
Palvodar qalasyndaǵy aýyl sharýashylyq jármeńkesine Jelezın, Tereńkól, Pavlodar, Sharbaqty aýdandary jáne Pavlodar qalasynyń óndirýshileri qatysty.
— Apta saıyn ótetin jármeńke búgin «Taza Qazaqstan» aktsııasy aıasynda uıymdastyrylyp otyr. Munda aýyl sharýashylyǵy taýaryn óndirýshiler men qaıta óńdeý kásiporyndarynyń keń assortımenttegi balǵyn ári sapaly ónimderi satylyp jatyr. Buǵan deıin jergilikti turǵyndar saýda ornyna kelgende ekologııany qoldaý maqsatynda ózderimen birge eko-shopperler alyp kelýin, sondaı-aq bıoydyraıtyn nemese qaıta óńdeletin qaptamalardy paıdalanýdy suraǵan edik. Mundaı jármeńkeler Ekibastuz ben Aqsý qalalarynda, sondaı-aq oblystyń 10 aýdanynda uıymdastyrylýda, — dep atap ótti oblystyq aýyl sharýashylyǵy basqarmasy qaıta óńdeýdi jáne kooperatsııany damytý bóliminiń bas mamany Tatıana Nagýla.
Kásipker Konstantın Beloýsov Ýspen aýdanynan kelipti. Aıtýynsha, ıeligindegi shaǵyn sharýashylyq kúnbaǵys dánin sýyqtaı syǵyp, tabıǵı taza ónim shyǵarady. Rafınadtalǵan kúnbaǵys maıyndaı emes, bul maı — tabıǵı ólshemderi tolyqtaı saqtalatyn sapaly ekologııalyq ónim.
— Eń bastysy turǵyndar taza ónimdi tutynýy kerek. Taza azyq-túlik tutynǵan adamnyń jan dúnıesi de taza bolady. Ekinshiden, aınalamyzdyń taza bolýy bizdiń is-áreketimizge baılanysty. Bazardaǵy jumysymyz aıaqtalǵan soń turǵan ornymyzdy tazartyp, barlyǵyn jýyp, súrtip ketemiz. Ári saýda jasaý barysynda da sórelerimizdiń muntazdaı bolýyn qadaǵalaımyz. Tutynýshylar buǵan da mán beredi, — deıdi ol.
Pavlodar qalasynyń kásipkerlik jáne aýyl sharýashylyq bóliminiń bas mamany Іlııas Altybaev búgingi saýda jármeńkesiniń sońy satýshylar úshin shaǵyn senbilikke ulasatynyn jetkizdi.
— Jabyq ǵıramat ishinde turǵandar, daladaǵy jartylaı ashyq pavılonda óz ónimderin saýdalaıtyndar tústen keıin jármeńke aıaqtalǵan soń aınalasyn jıystyryp, qaldyq ónimderdi arnaıy konteınerge aparyp salady. Et ónimderi satylatyn jerler zararsyzdandyrylady, — deıdi bólim ókili.
Kókónis satyp alý kezeginde turǵan Andreı Rýblev esimdi qarııa bul kúni qolyna óńdeletin qaltasha ustap kelipti. Aıtýynsha, shúberekten jasalǵan qapshyqtardy táýir kóredi. Polıetılen paketter sııaqty emes, ony jýyp, qaıtadan paıdalanýǵa bolady. Ári ekologııalyq jaǵynan qaýipsiz, qorshaǵan ortaǵa tastasań ydyrap ketedi.
Aıtyp ótýimiz kerek, «Jailau» fermerlik bazary Memleket basshysy Qasym-Jomart Toqaevtyń «Egistikten — sórege deıin» qaǵıdasyn júzege asyrý aıasynda 2022 jyly ashylǵan bolatyn. Munda zamanǵa saı bazar ǵımarattary, azyq-túlik qoımasy jáne dalada saýda pavılondary ornalasqan. Ár senbi saıyn óńirdegi sharýashylyqtar jınalyp, jármeńke ótkizedi. Al jabyq bazardyń ózi aptanyń 6 kúninde jumys istep, tutynýshylarǵa azyq-túlik taýarlaryn jergilikti naryqtaǵydan 15-20 paıyzǵa arzanǵa satady.
Búginde munda kartop — 115-125 teńge, jylqy men sıyr etiniń kılogramy — 3100 teńge, sábiz — 115-130, qııar men qyzanaq 1000 teńgeden satylyp jatyr. Aldaǵy ýaqytta ońtústikten jańa pisken ónimder jetkizile bastaýyna oraı azyq ónimderiniń assortımenti odan ári keńeı túsedi.
Eske sala keteıik, Prezıdent Taza Qazaqstannyń túpki máni qoǵamdyq sanany jańǵyrtý ekenin atap ótken bolatyn.
