Pavlodarda taıqazannan bir tonnadan astam naýryz kóje taratyldy

ASTANA. QazAqparat - Pavlodarda Áz Naýryz merekesiniń qorytyndy kúni ortalyq alańda 70-ten astam kıiz úı qurylyp, bir tonnadan astam naýryz kóje taratyldy, dep habarlaıdy QazAqparat pavlodarnews.kz silteme jasap.

«Segiz aýylda qazaq halqynyń salt-dástúrleri, ádet-ǵurpy men turmys-tirshiliginen syr shertetin kórinister qoıylyp, kórmeler uıymdastyryldy. Qalǵan 62 kıiz úıdiń árqaısysynda 500 adamǵa palaý men baýyrsaq usynyldy»,  - deıdi Pavlodar oblysynyń Mádenıet, qujattama jáne arhıvter basqarmasy basshysynyń orynbasary Asylbek Meıirmanov.

Sonymen qatar, kóshege ulttyq kıimmen shyqqan pavlodarlyqtar da nazardan tys qalmaǵan. Eń ádemi ulttyq kıim kıgen 20-dan astam qonaq yntalandyrý syılyǵyna ıe bolsa, «Jado» sán úıi osy atalym boıynsha kúmisten jasalǵan alqa men qamzoldy bas júldege usyndy.

Aıta keteıik, Ertis óńiri osymen ekinshi jyl Naýryz merekesin 40 kún toılaýda. Áni men sáni jarasqan ulyq meıramda Ertis jaǵalaýynda Syr, Jetisý, Arqa, Shyǵys pen Batystyń dástúrli ánderi áýeledi. Sondaı-aq, qazaq estardasynyń jaryq juldyzdary Dıana Sharapova, Parvız Nazarov pen Qýandyq Rahym óner kórsetedi.