Pavlodarda Táýelsizdik merekesi qarsańynda Ertis Olympic basseıni ashyldy
Nysannyń iske qosylýyna qatysqan oblys ákimi Bolat Baqaýov turǵyndardy aldaǵy elimizdiń egemendik merekesimen quttyqtady.
«Memleket basshysy deni saý ult básekege qabiletti bolatynyn jáne sporttyń buqaralyq sıpatyn damytý elimizdiń startegııalyq basym baǵyttarynyń biri ekenin atap ótken bolatyn.
Elbasy óz Joldaýynda 2020 jylǵa deıin halyqtyń 30 paıyzyn sportqa tartý týraly mindet qoıǵan. Búginde aımaqta kóptegen sporttyq nysandar boı kóterýde. Muz arenasynyń qurylysy aıaqtalýda. Kelesi jyly úsh aýqymdy joba iske asyrylady. Sondaı-aq, jabyq jeńil atletıkalyq fýtbol maneji men olımpıadalyq rezervti daıyndaý ortalyǵyn atap ótýge bolady»,- dedi Bolat Baqaýov.
Aımaq basshysy óńirdiń áleýmettik-ekonomıkalyq damýyna úles qosqan demeýshiler ERG Toby, KAZ Minerals, «TsATEK» AQ turǵyndardyń atynan alǵysyn bildirdi.
«Bul basseıin óndiris alpaýyttary, áleýmettik seriktesterdiń qoldaýymen salynǵan.
Júzý - olımpıadalyq sporttyń mańyzdy túri. Bizdiń oblysta sporttyń bul túrimen 5000-nan astam adam aınalysady. Onyń ishinde 80-i Qazaqstannyń ulttyq qurama komandasyna kiredi. Mundaı sporttyq nysandar halyqaralyq dárejede joǵary nátıjelerge jetýge múmkindik beredi. Nysannyń salynǵan orny bekerge tańdalyp alynbaǵan. 30 jyl buryn munda batpaqty aýmaq bolǵan. Ertis alqabynyń bir bóligi qurylysqa jaramaıtyn edi. Alaıda, aǵa býyn ókilderiniń arqasynda keptirý boıynsha gıdromehanıkalyq jumystar júrgizildi», - dep atap ótti ol.
ERG dırektorlar keńesiniń tóraǵasy Aleksandr Mashkevıch Pavlodar oblysynda sporttyq nysannyń qurylysyna kompanııanyń úles qosqany úlken qýanysh ekenin atap ótti.
«Pavlodar oblysynda bolǵanyma 25 jyldan astam ýaqyt ótti. Búgingi basseınniń iske qosylýy memlekettiń durys baǵytta damyp kele jatqandyǵynyń aıqyn dáleli», - deıdi Aleksandr Mashkevıch.
Oblys ákimi 90 jyldyń basynda salyna bastaǵan Ýsolka shaǵynaýdanynyń búgingi kúni qatty ózgergenine toqtaldy. Shapshań damyp kele jatqan aýdanda qazirgi tańda 100 myńdaı adam turady. Onyń úshten bir bóligin jastar quraıdy. Kezinde turǵyndar bul aýdannan páter alǵysy kelmeıtin. Qazir osy jerden oryn alǵan kardıologııalyq ortalyqta 15 myńnan astam ota, onyń ishinde bes myńy ashyq júrekte jasaldy. № 4 qalalyq emhana, Nazarbaev Zııatkerlik mektebi, shańǵy-roller bazasy ornalasqan, akademııalyq eskek bólimi ashylǵan. «Nurly jer» baǵdarlamasy boıynsha jáne kompanııalardyń qoldaýymen turǵyn úıler boı kóterýde.
Eske sala keteıik, atalǵan nysannyń qurylysy 2017 jyldyń sáýir aıynda bastalǵan bolatyn. 300 oryndyq minberleri bar basseın demeýshilerdiń qarajatyna boı kóterdi. Jobanyń jalpy quny 2,7 mıllıard teńge.
