Pavlodarda Táýelsizdik kúnine oraı jalpyhalyqtyq kúı tartý jobasy bastaldy

PAVLODAR. QazAqparat - El Táýelsizdiginiń 30 jyldyǵyn toılaý aıasynda «JEBE» qoǵamdyq birlestigi «Kúı kerýeni» jalpyhalyqtyq jobasyn bastady, dep habarlaıdy QazAqparat Pavlodarnews.kz-ke silteme jasap.

Erekshe joba búgin, 16 qarashada, saǵat 15.00-de Estaı atyndaǵy mádenıet saraıynda bastaý aldy.

- Jobanyń tusaýkeserine I.Baızaqov atyndaǵy oblystyq fılarmonııa jáne óńirimizdiń barlyq qala, aýdandaryndaǵy ónerpazdar bir mezgilde qatysty. Azat eldiń aıbynyn asyratyn aıyryqsha bastamaǵa bir ýaqytta myńdaǵan adam qatysyp, dala men qalany bir mezette dombyranyń kúmis kúmbirine bólemek, - dedi «JEBE» QB múshesi Alpysbaı Honj.

Jańa jobaǵa Pavlodar oblystyq mádenıet, tilderdi damytý jáne arhıv isi basqarmasy, sondaı-aq oblystyq bilim berý basqarmasy qoldaý kórsetýde.
Joba bastalǵan sátte Pavlodar oblysynyń barlyq qala, aýdandaryndaǵy jeke ónerpazdar, óner ujymdary, mektep oqýshylary kúı shertti. Sondaı-aq Qazaqstannan tys Monǵolııanyń Baıan-Ólgeı qalasynan «Kúltegin» óner ujymy da dombyralaryn qolyna alyp, qoldaý bildirdi.

Qazaqtyń taǵdyrymen bite qaınasqan osy dombyra. Negizgi maqsatymyz – qazaqtyń dalasy dombyra únimen terbelip turýy, jastardyń boıyna otansúıgishtik sezimdi darytý. Sondyqtan tek oblyspen shektelmeı, elimizdegi, jer betindegi barsha qazaqty osy bastamaǵa qosylýǵa shaqyramyz, - dedi Alpysbaı Honj.

«Kúı kerýeni» jalpyhalyqtyq jobasy osy jyldyń 16 qarashasy men 16 jeltoqsany kúnderi ótedi. Sharaǵa nıetti kez kelgen jan (jeke adam, otbasymen birge, ujym bolyp) qatysa alady.