Pavlodarda taýar qunyn jasyrǵan 25 kásipker jazalandy
PAVLODAR. KAZINFORM — Taýarda baǵa kórsetkishiniń bolmaýy — tutynýshylar saýda jasaý kezinde jıi tap bolatyn keleńsiz jaǵdaılardyń biri. Mundaı jaǵdaıda satyp alýshy satýshyǵa júginýge májbúr bolady.
Pavlodar oblysynda jyl basynan 25 kásipkerlik sýbektisi baǵa kórsetkishteriniń bolmaýy jáne taýarlardyń qunyn kórsetý talaptaryn buzǵany úshin ákimshilik jaýapkershilikke tartylǵan.
— Sońǵy jaǵdaılardyń biri Pavlodar qalasynda boldy. Tutynýshy jergilikti iri sýpermarketterdiń birinde birneshe taýarǵa baǵa kórsetkishteri qoıylmaǵanyna narazylyq tanytty. Turǵynnyń ótinishi boıynsha departament jospardan tys tekserý júrgizip, zań buzýshylyqty tirkedi. Ári atalǵan quqyq buzýshylyq buryn salynǵan ákimshilik jaza qoldanylǵannan keıin bir jyl ishinde qaıtalanǵany anyqtaldy, — dep habarlady Pavlodar oblysy boıynsha saýda jáne tutynýshylardyń quqyqtaryn qorǵaý departamentinen.
Atalǵan sýpermarket Ákimshilik quqyq buzý týraly kodekstiń 193-baby 5-bóligine sáıkes ákimshilik jaýapkershilikke tartylyp, 200 aılyq eseptik kórsetkish mólsherinde aıyppul arqalaǵan.
Departament mamandary atalǵan Kodekstiń 193-baby 4-bóligine sáıkes taýarǵa baǵa qoıylmasa nemese baǵa kórsetkishinde kórsetilgennen joǵary baǵamen satylsa, kásipkerlik sýbektileri aıyppul tóleıtinin eskertedi. Shaǵyn kásipkerlik sýbektilerine — 6 AEK, orta kásipkerlik sýbektilerine — 10 AEK, iri kásipkerlik sýbektilerine — 30 AEK. Quqyq buzýshylyq bir jyl ishinde qaıtalanǵan jaǵdaıda, Kodekstiń 193-baby 5-bóligine sáıkes aıyppul mólsheri tıisinshe 65, 120 jáne 200 AEK.
Eske sala keteıik, elimizde tutynýshylarǵa 1,5 mlrd teńge qaıtaryldy.
