Pavlodarda tarıhı tulǵalardyń onnan astam dombyrasy kórmege qoıyldy
Ulttyq dombyra kúnine oraı uıymdastyrylǵan kórmege óńirimizdiń óner áleminde izderi qalǵan tulǵalardyń sýreti men qoldanǵan dombyralary qoıyldy.
"Dombyra men qazaq egiz uǵym. Dombyrasyz qazaqty, qazaqsyz dombyrany elestetý múmkin emes. Sondyqtan Ulttyq dombyra kúnine oraı mýzeıimizde kórme ashtyq", - dedi mýzeıdiń bas qor saqtaýshysy Álııa Samatova.
Aıta ketsek, kórmeniń ınstallıatsııasy jazýshy, jýrnalıst Meıram Asylǵazın, ánshi, kompozıtor Júnisbek Shaımerdenov, ánshi, kompozıtor Rahmethan Nurbasarov, ustaz, qolóner sheberi Nurbek Ádilbekovtyń jáne ózge de maıtalman tulǵalardyń dombyralarynan jasaldy. Oǵan qosa kórmege Káýken Kenjetaevtyń aqqý basty dombyrasy da qoıylǵan. Kórmeniń ashylý saltanatynda tulǵalarymyz jóninde málimet berilip, S.Toraıǵyrov atyndaǵy PMÝ qazaq tili jáne jýrnalıstıka kafedrasynyń meńgerýshisi Aıman Faızýllaqyzy dombyranyń tarıxyna tereńnen úńildi. Sonymen qatar, óńirimizge tanymal ánshi, kúıshiler ónerlerin ortaǵa saldy. Shara barysynda dombyra jasaý isiniń mamany Qýandyq Baıazıtov sheberlik saǵatyn ótkizdi. Aıta keteıik, Buqar jyraý atyndaǵy ádebıet jáne óner mýzeıiniń qorynda 20-dan astam dombyra bar. «Ǵasyrlar úni» kórmesine 10-nan astam dombyra qoıyldy.
3 shildede bastalǵan kórmeni qala turǵyndary men qonaqtary 13 shildege deıin tańǵy saǵat 9:00-den bastap, 18:00-ge deıin tamashalaı alady.
