Pavlodarda tańerteń aıaz saldarynan tramvaılar turyp qaldy
ASTANA. QazAqparat - Pavlodarda 1 Mamyr kóshesi boıynda birneshe tramvaı turyp qalyp, «kepteliske» sebep boldy, dep habarlaıdy pavlodarnews.kz.
Pavlodar tramvaı basqarmasynyń baspasóz hatshysy Tımofeı Golevtiń aıtýynsha, qoǵamdyq kólik qarasha aıynda túsken 30 gradýstyq aıazdyń saldarynan toqtap qalǵan.
«Aýa temperatýrasynyń oqys aýysýyna baılanysty birinshi baǵytta kele jatqan vagondardyń symdaryn muz basqan. Nátıjesinde júrgizýshige jyldamdyqty tómendetip, toqtaýǵa týra kelgen. Sonyń saldarynan saǵat 08-25-te qozǵalys kúrt tyıylǵan. Qazir depoda jóndeý jumystary júrgizilýde», - deıdi Tımofeı Golev.
Aıta keteıik, Pavlodarda synap baǵanasynyń tómendeýine baılanysty 1-4 synyptarda sabaq ótkizilmeıdi. Sınoptıkterdiń boljamynsha, aıaz óńirde áli bir apta turady.
