Pavlodarda taksıst jolaýshyny umytyp ketken

PAVLODAR. QazAqparat – Pavlodar oblysynda taksı júrgizýshisi jolaýshyny otyrǵyzbastan júrip ketken. Áleýmettik jelide taraǵan vıdeoǵa qatysty polıtsııa málimet berdi, dep habarlaıdy QazAqparat.

Pavlodar qalasyndaǵy Arǵynbaev kóshesi boıynda bolǵan oqıǵa daladaǵy vıdeokameraǵa túsip qalǵan.

Egde jastaǵy áıel taksı shaqyrǵan. Kelgen kóliktiń artqy esigin ashyp, aldymen azyq-túlik, ámııan, telefon salynǵan qol sómkesin oryndyqqa qoıyp, esikti japqan. Ózi kóliktiń ekinshi jaǵynan otyrmaq bolǵan. Alaıda, mashınanyń arǵy betine aınalyp baramyn degenshe, kólik ony tastap ketip qalǵan.

«Turǵynnyń pavlodarlyq týystary dereý polıtsııaǵa qońyraý shalyp, oqıǵa týraly habarlady. Shaqyrýǵa kelgen ýchaskelik polıtsııa ınspektory taksı júrgizýshisin anyqtady. Júrgizýshi túsindirgendeı, ol qala turǵynynyń kólikke otyrmaǵanyn baıqamaǵan jáne bolǵan oqıǵa úshin keshirim surady. Sómke qala turǵynyna qaıtaryldy», - delingen polıtsııa málimetinde.