Pavlodarda taksı júrgizýshilerdiń basym bóligi salyq tólemeıdi
PAVLODAR. QazAqparat - Oblystyq máslıhat depýtattary jol-patrýldik qyzmet ókilderimen birlese Pavlodarda qajetti qujattarsyz jumys isteıtin taksı júrgizýshilerdi anyqtaý boıynsha reıd ótkizdi, dep habarlaıdy pavlodarnews.kz.
Reıd nátıjeleri boıynsha qaladaǵy Táýelsizdik dańǵylynda 10 taksı júrgizýshisiniń jeteýinde jeke kásipkerlikti aıǵaqtaıtyn kýálik, patent nemese taksoparkpen jasalǵan kelisimshart bolmaǵan. Sondaı júrgizýshiniń biri - «Regıon» takspoparkiniń ókili Evgenıı Shenkevıch. Onyń sózine qaraǵanda, barlyq qujattary ofıste saqtaýly. - Eńbek qarym-qatynastaryn rásimdemeı taksı qyzmetin kórsetip júrgen tulǵalardyń sanyn anyqtaý maqsatynda reıdtik is-shara ótkizýdemiz. Sondyqtan, mundaı jaǵdaı bolashaqta qaıtalanbasy úshin kelisimsharttyń kóshirmesin birge alyp júrýdi ótinemiz, - dedi júrgizýshige depýtat Aleksandr Polıakov.
Atalǵan másele Depýtat Anatolıı Boıchınniń de alańdaýshylyǵyn týdyrdy. Meni burynǵy salyq qyzmetiniń ókili retinde bul fakt alańdatady, - deıdi Anatolıı Boıchın. «Qalaı degenmen, on taksıstiń jeteýinde qajetti qujattar joq. Bul az emes. Muny sheshý joldaryn izdestiremiz. Búgin eshbir shara qoldanbadyq, tek júrgizýshilerdi aqparattandyrdyq. Bastysy taksıstiń kásipker ekendigin dáleldeıtin kýáligi, sosyn ol salyq organdarynda tirkelgen qujaty bolýy kerek»,-deıdi ol.
Aıta keteıik, jyl sońyna deıin qyzmet kórsetý salalarynyń barlyq túrlerine osyndaı reıdter ótkiziledi.
