Pavlodarda «TAKORP» qarjy pıramıdasyn uıymdastyrǵandarǵa sot úkimi kesildi

PAVLODAR. KAZINFORM — Pavlodar qalasynda AQSh-taǵy jarnamalyq qosymshalar platformasy retinde kórsetilgen «TAKORP» qarjy pıramıdasyn uıymdastyrǵan tulǵalarǵa qatysty sot úkimi shyǵaryldy. Bul týraly QMA málim etti.

«TAKORP» qarjy pıramıdasy ınnovatsııalyq jarnama tehnologııalaryna baǵyttalǵan AQSh platformasy retinde tanystyrylǵan. Jobanyń qatysýshylaryna «OKX» krıptobırjasy arqyly krıptovalıýta satyp alý arqyly tirkelý usynylǵan. Negizgi sharttardyń biri — keminde 5 jańa salymshyny tartý.

— Bul talap oryndalǵan jaǵdaıda «baq dóńgelegine» qatysýǵa jáne baǵaly syılyq utyp alýǵa múmkindik berildi. Nátıjesinde, 80-nen astam azamat ýádege senip, 30-dan 500 AQSh dollaryna deıin ınvestıtsııa salǵan, keıbiri deńgeıine qaraı 2 myń AQSh dollaryna deıin bonýs alamyz dep úmittengen. Qylmystyq jolmen alynǵan tabys 59 mln teńgeden asty. Pıramıdany nasıhattaý maqsatynda Zoom platformasy arqyly beınekonferentsııalar formatynda jarnama júrgizilgen, — delingen habarlamada.

Bul kezdesýlerdiń negizgi maqsaty salymshylardyń materıaldyq jaǵdaıyn jaqsartý dep kórsetilgenimen, shyn máninde, jańa qatysýshylardy tartý qajettigi basty nazarda bolǵan. Salymshylardyń qarajatyna kúdiktiler Pavlodar qalasynan páter satyp alyp, tórt bank depozıtin ashqan.

Atalǵan múlikke sottyń sanktsııasymen tyıym salyndy. Sot qarjy pıramıdasyn uıymdastyrýshylardy 1 jyl 6 aıdan 7 jylǵa deıin bas bostandyǵynan aıyrý jazasyna kesti. Sot úkimi zańdy kúshine engen joq. Zardap shekken azamattarǵa keltirilgen shyǵyndy óteý máselesi azamattyq is júrgizý sheńberinde qaralatyn bolady.