Pavlodarda taǵy bir jigit sýǵa batyp kóz jumdy
PAVLODAR. KAZINFORM - Qutqarýshylar er adamnyń múrdesin sýdan alyp shyqty. Qaıǵyly oqıǵaǵa kýá bolǵandar jigit sýıtsıd jasady degen pikir aıtyp otyr.
Pavlodardaǵy Ýsolka ózeninde taǵy bir jas jigit sýǵa batyp ketti.
1995 jylǵy er azamat arnaıy jabdyqtalmaǵan jerde shomylǵan.
«25 maýsym kúni saǵat 17.51-de Pavlodar qalasynyń Ýsolka ózeninen jedel qutqarý jasaǵynyń qyzmetkerleri er adamnyń denesin alyp shyqty. Ol ruqsat etilmegen jerde sýǵa túsken. Jedel járdem qyzmetkerleri oǵan reanımatsııalyq áreketter jasap, júreginiń toqtaǵanyn anyqtady. Kýágerlerdiń sózinshe jigit sýıtsıdtik áreketke barǵan», dep habarlady óńirlik tótenshe jaǵdaılar departamentiniń baspasóz qyzmetinen.
Buǵan deıin Pavlodarda eki jigit sýǵa batyp ketkenin jazǵan bolatynbyz. Olardyń múrdesin súńgýirler alyp shyqty.
