Pavlodarda sý toly shuńqyrlarǵa asfalt tósegenderdiń áreketi kóptiń ashýyn týǵyzdy
PAVLODAR. KAZINFORM — Jelide kóshe joldaryndaǵy oı-shuńqyrlardy jóndeý jumystaryna qatysty túsirilgen vıdeo talqylanyp jatyr. Kadrlardan asfalttyń sý toly shuńqyrlarǵa tógilip, tóselip jatqany baıqalady.
Beınejazba Instagram-daǵy jergilikti pablıkterdiń birinde jarııalandy. Rolık avtory kadrlardyń 25 naýryzda túsirilgenin aıta kelip, álgindeı jóndeýdiń múlde qajeti bar-joǵyna kúmán keltiredi. Jańa asfalt eshqandaı daıyndyqsyz, shalshyq sýǵa tógile salady da ústinen tegistelip jatyr.
Mundaı beıbereket jóndeý jumystary jeli qoldanýshylarynyń ashýyn týǵyzdy. Qala turǵyndary sapasyz tóselgen asfalt uzaqqa shydamaıtynyn aıtady. Qyzyq bolǵanda jelide merdigerdi jaqtap shyqqandar da tabyldy. Olardyń aıtýynsha, turǵyndar durys joldy talap etedi. Al jol jóndeýshiler qoldan kelgenshe jasap jatqany anyq.
Pavlodar qalasynyń ákimi Hasar Habylbekov kóp talqysyna túsken máselege nazar aýdaryp, bıýdjet qarajaty bosqa jumsalyp jatyr dep alańdaýdyń qajeti joqtyǵyn túsindirdi.
— Bul — kóshelerdegi qaýipsiz qozǵalysty qamtamasyz etýge arnalǵan ýaqytsha shara. Oǵan bıýdjet qarajaty shyǵyndalmaıdy. Merdiger uıymdar bul jumysty óz esebinen istep jatyr. Árıne, keıbir turǵyndarda nege shalshyq sýǵa asfalt tóselip jatyr, nege asfalt kesilmeı jatyr degen suraq týyndaıdy. Munyń sebebi biz negizgi jóndeý jumystary bastalǵanǵa deıin qaýipsizdikti qamtamasyz etýge kóńil bóldik. Merdigerlerge óz esebinen shuńqyrlardy ýaqytsha jamap-jasqaý týraly tapsyrma berdik, — deıdi shahar basshysy.
Eske sala keteıik, Shymkentte joldyń qaq ortasynda asfalt opyrylyp tústi.
