Pavlodarda sút óndirisiniń kólemi 31,5 myń tonnaǵa artty

ASTANA. KAZINFORM — Bıyl Pavlodar oblysynda sútti mal sharýashylyǵyn damytýǵa 5,3 mlrd teńge bólindi. Bul týraly QR Aýyl sharýashylyǵy mınıstrligi habarlady.

Pavlodarda Soltústik Qazaqstan oblysynyń tájirıbesin taratý baǵdarlamasy aıasynda salynǵan eń iri sút-taýarly fermalarǵa baspasóz týry ótti. 

Shara memlekettik qoldaýdy paıdalana otyryp, zamanǵa laıyqty sút-taýarly fermalardy qurýdyń tabysty úlgilerin nasıhattaýǵa baǵyttalǵan.

Aımaqta mal jáne egin sharýashylyǵyn qatar damytyp kele jatqan «Kronos-Pavlodar» kompanııasy «Jol kartasy» baǵdarlamasy aıasynda 1 893 mal basyna arnalǵan sút-taýarly ferma salý jobasy iske asyrylǵan. Búgingi kúni alǵashqy kezeńi paıdalanýǵa berildi, ol 1 440 bas maldy qamtıdy. Kásiporynǵa qarasty 2 421 gektar jerdiń 848,5 gektary — sýarmaly alqaptar. Ferma zamanaýı saýý zaldarymen, buzaýlarǵa arnalǵan qora-jaılarmen jáne avtomattandyrylǵan jemshóp berý júıelerimen jabdyqtalǵan. Jemshóp daqyldaryn sýarý úshin 10 ZIMMATIC jańbyrlatqysh mashınasy qoldanylady.

Al quny 5,2 mlrd teńgeni quraıtyn ınvestıtsııalyq jobany júzege asyryp otyrǵan «Agro-Trade PV» kásipornynda 1 467 mal basyna arnalǵan sút-taýarly ferma jumys isteıdi. Onyń ishinde 1 127 sıyr golshtın-frız tuqymyna jatady. Jylyna 15,7 myń tonna sút óndiriledi. 2 232 gektardy quraıtyn jer qorynyń 1 634 gektary — sýarmaly jerler. Ferma tolyqtaı GRIMME, John Deere, KUHN, Valley sııaqty álemdik brendtik tehnıkalarmen jabdyqtalǵan.

Vengrııadan 2023 jyly 204 bas asyl tuqymdy mal ákelingen. Byltyr qazan aıynda qosymsha 432 basqa arnalǵan nysandardyń qurylysy aıaqtaldy. Sondaı-aq, memlekettik qoldaý aıasynda: «Galıtskoe» seriktestigine Slovakııadan 349 bas sımmental tuqymdy iri qara ákelindi, «Úshterek ı K» seriktestigine 900 bas asyl tuqymdy iri qara satyp alyndy, al «Pahar» seriktestigine 355 bas iri qara ákelindi.

Osyndaı naqty sharalardyń nátıjesinde oblystaǵy sút óndirisiniń kólemi jylyna 31,5 myń tonnaǵa artty. Al 2025-2026 jyldarǵa arnalǵan mańyzdy jobalar qatarynda: «BIK» JShS — 500 basqa arnalǵan STF qurylysy salynýda (quny 2,2 mlrd teńge), 6 saýý roboty jetkizildi, daıyndyq deńgeıi — 90 paıyz. Joba 2025 jyldyń sońyna deıin aıaqtalady dep josparlanǵan.

Sondaı-aq «Andas Agro» JShS — kelesi jyly 600 basqa arnalǵan STF iske qosý josparlanyp, Germanııadan asyl tuqymdy mal satyp alý kózdelip otyr. «Bastaýshy Agro» JShS — 2026 jyldyń qańtarynda 600 basqa arnalǵan STF qurylysyn bastaıdy. Joba quny — 3,8 mlrd teńge (onyń ishinde 640 mln — menshikti qarajat, 3,2 mlrd — ÁKK arqyly 2,5% mólsherlememen alynǵan qaryz qarajat). Jyldyq óndiris kólemi — qosymsha 4,2 myń tonna sútti quraıdy.

Bıyl oblysta sútti mal sharýashylyǵyn damytýǵa 5,3 mlrd teńge bólindi. Qarajat ımporttyq analyq mal satyp alýǵa, uryq alýǵa jáne sút óndirýge arnalǵan sýbsıdııa túrinde beriledi.
Aıta keteıik, Pavlodar oblysy sútti mal sharýashylyǵynda turaqty ósim kórsetip otyr. Іri qara 492,1 myń basqa jetse, sút óndirisiniń kólemi — 179,6 myń tonnany qurap, bir sıyrdan ortasha saýym — jylyna 6 530 kılogramǵa jetti. Oblysta 17 zamanaýı sút-taýarly ferma jumys isteıdi.

Aıta keteıik, buǵan deıin Pavlodar qalasynda turǵyn úılerge jylý berile bastaǵanyn jazdyq.