Pavlodarda sýǵa toly kóshelerdi tazartýǵa 51 tehnıka jumyldyryldy
PAVLODAR. KAZINFORM – Pavlodar qalasy men Atameken kentin, Aqsý men Pavlodar aýdanyndaǵy kóshelerdi sý basqan. Tótenshe jaǵdaı qyzmetiniń jáne atqarýshy bıliktiń birlesýimen jınalyp qalǵan qarǵyn sýdy sorý jumystary júrgizilip jatyr.
Óńirlik tótenshe jaǵdaılar departamentiniń baspasóz qyzmetinen habarlaǵandaı, qardyń kúrt erýine baılanysty kóshelerdiń oıpań tustaryna sý jınalyp qalǵan. Qarǵyn sýdyń úıler men ózge de ǵımarattarǵa nuqsan keltirgeni týraly aqparat ázirge tirkelmegen.
- TJD kúshteri men jergilikti atqarýshy organnyń birlesýiniń nátıjesinde Pavlodar qalasy men Atameken kentinde, Aqsý qalasy men Pavlodar aýdanyndaǵy birqatar eldi mekende erigen qar sýyn sorý jumystary jalǵasyp jatyr. Jalpy sany 115 adam men 51 tehnıka, 21 motopompa jumyldyrylǵan. Bir kúnniń ishinde 27 myń tekshe metrden astam sý sorylyp alyndy, - dep habarlady baspasóz qyzmetinen.
Buǵan qosa mamandar «Atameken-Aqsý-Kóktóbe-Kýrchatov» respýblıkalyq mańyzy bar avtojolynyń 15 jáne 129 shaqyrymdarynda sýdyń mol mólsherde jınalyp qalǵanyn habarlady. Jol boılaryn bıiktetý sharalary júrgizilip, qum toltyrylǵan 620 qapshyq pen 45 tonna ınertti materıaldar tóseldi.
