Pavlodarda sýǵa batyp ketken jattyqtyrýshynyń denesi tabyldy
PAVLODAR. QazAqparat – «Vita» izdeý jasaǵy eriktileriniń málimetinshe, sýǵa batyp ketken Roman Bogdanovtyń denesi Ertis ózenindegi Aqsýǵa shyǵatyn kópirdiń astynan tabyldy, dep habarlaıdy QazAqparat Pavlodarnews.kz saıtyna silteme jasap.
«10 qyrkúıek kúni saǵat 16:30-da balyq aýlap júrgen adam máıittiń sý betinde qalqyp júrgenin kezdeısoq baıqap qalǵan», - deıdi izdeý jasaǵy.
Oblystyq tótenshe jaǵdaılar departamentiniń málimetinshe, kóz jumǵan jattyqtyrýshynyń denesi saǵat 16:53-te sýdan shyǵarylǵan.
Eske salaıyq, 27 jastaǵy pavlodarlyq balyq aýlaý kezinde jaǵadan aıaǵy taıyp, ózenge qulap ketken. Qasynda dostary bolǵan, alaıda, jigit júze almaıdy eken.
Qutqarýshylardyń aıtýynsha, Roman qulaǵan jerdiń tereńdigi – 12 metr. Pavlodarlyq jigitti qutqarýshylar, polıtseıler, eriktiler, onyń dostary men týystary 6 kún boıy izdestirgen.
