Pavlodarda sý jelisin jóndeý kezinde topyraq opyrylyp, eki adam mert boldy
PAVLODAR. KAZINFORM - Pavlodar qalasynda sý qubyrlaryn jóndeý kezinde topyraq qulap, qazylǵan shuńqyrdaǵy birneshe adamdy basyp qalǵan. Ókinishke qaraı, olardyń ekeýi qaza bolǵany anyqtaldy.
112 pýltine jer qazý jumystaryn júrgizý kezinde topyraq qulaǵany týraly habarlama túsken. Opyrylǵan jerdiń tereńdigi shamamen 6 metr bolǵan.
- Oqıǵa ornyna shuǵyl túrde tótenshe jaǵdaılar departamentiniń kúshteri men quraldary jiberildi. Qutqarýshylar jetkenge deıin kásiporyn jumysshylary bir adamdy syrtqa shyǵaryp alǵan. Bizdiń mamandar topyraq astynan taǵy eki zardap shegýshini aman alyp shyqty. Taǵy eki adamnyń múrdesi anyqtalyp, olardyń denesin joǵaryǵa kóterdi, - dep habarlady óńirlik Tótenshe jaǵdaılar departamentinen.
Zardap shekken jumysshylardy Apattar medıtsınasy ortalyǵynyń brıgadasy qarap, keıinnen aýrýhanaǵa jatqyzý úshin jedel medıtsınalyq kómek brıgadalaryna tapsyrǵan.
Oblystyq Polıtsııa departamentiniń habarlaýynsha, qaıǵyly oqıǵa Soltústik ónerkásip aýmaǵynda, sý qubyryn jóndeý kezinde bolǵan.
- Eńbekti qorǵaý erejelerin buzý deregi boıynsha polıtsııa tarapynan sotqa deıingi tergeý bastaldy. Oqıǵanyń mán-jaıy men sebebi tergeý barysynda anyqtalatyn bolady, - dep málimdedi polıtsııadan.
Eske sala keteıik, ShQO-da jylytý maýsymynda órtten 20-dan astam adam kóz jumdy.
