Pavlodarda sý basqan úılerdiń turǵyndaryna qurylys materıaldary berilip jatyr
PAVLODAR. QazAqparat - Pavlodarda sý basqan úılerge qum, qıyrshyqtas pen tsement ákeline bastady, dep habarlaıdy pavlodarnews.kz.
Ekinshi Pavlodarda sý basqan úılerge qalalyq máslıhat pen «Nur Otan» partııasynyń depýtattary qolushyn sozdy.
«Búgingi kúni depýtattar men kásipkerler 28 proflıst, 34 tonna tsement, 1700 kirpish, 700 keli bıtým, úsh kólik qıyrshyqtas, 140 tonna qum, 1970 keli shpaklevka, 185 keli emýlsııa ákeldi», - dedi qalalyq «Nur Otan» partııasy tóraıymynyń mindetin atqarýshy Ásem Jaqubaldına. - Arnaıy tehnıkany TÚKSh bólimi bóldi. Budan basqa, jalǵyzbasty zeınetkerler men kópbalaly otbasylarǵa azyq-túligi bar 12 paket taratyldy».
Ásem Jaqubaldınanyń aıtýynsha, tekseris nátıjesinde eń kóp zardap shekken 14 úı anyqtaldy. Sol sebepti kómek birinshi kezekte osy úılerge kórsetiletin bolady. Olardyń arasynda Altaı, 64/1 mekenjaıy boıynsha turatyn eki áıeldiń úıi bar. Olarǵa tehnologııalyq kolledjdiń stýdentteri keldi. - Men osy úıde 51 jyl turyp kelemin, - dedi Lıýdmıla Chenodets. - Mundaı máselege sońǵy úsh jylda ǵana tap bolyp otyrmyz. Jertóle sýǵa tolyp ketti, úıdiń irgetasy sýmen shaıylyp qaldy, qabyrǵalardyń barlyǵy jarylyp tur. Óz qolymyzben jóndeý jumystaryn bastaýǵa kúshimiz joq jáne qurylys materıaldaryn satyp alýǵa da qarajat jetpeıdi. Sondyqtan kórsetip otyrǵan kómek úshin alǵysymyzdy bildiremiz».
Aıta keterligi, ázirge turǵyndardyń áýrege salǵan sýdyń qaıdan kelgeni jáne quramy boıynsha qorytyndy daıyn emes.
« 17-18 mamyr kúnderi Ekinshi Pavlodarǵa kelgen edik. Depýtattar, TÚKSh jáne áleýmettik qorǵaý bólimderiniń mamandary kirgen arnaıy komıssııa quryldy. Barlyǵymyz úılerdi qarap shyqtyq. Zardap sheken úılerdiń basym bóliginiń qabyrǵalary jarylyp, úıdiń ishin ylǵal basqan», - dedi qalalyq máslıhattyń depýtaty Tileýbek Nurseıitov.
Eske sala keteıik, Ekinshi Pavlodarda ornalasqan 200-ge jýyq jer úıdi sý jaılaǵan. Sý «Pavlodar jylý jelileri» JShS nemese «Pavlodar sý arnasy» JShS-nen kelýi múmkin, biraq onyń nátıjesin saraptama kórsetedi. Saraptama rastalǵan jaǵdaıda aımaqta tótenshe jaǵdaı rejimi jarııalanýy tıis.
