Pavlodarda stýdentter men oqýshylardan aqsha bopsalaǵandar ustaldy
PAVLODAR. KAZINFORM - Pavlodar oblysynda jedel ýákilder stýdentter men oqýshylardan aqsha bopsalaý faktileriniń jolyn kesti. Bopsalaýshylar jábirlenýshilerden baǵaly zattaryn lombardqa ótkizip, túsken aqshany berýdi talap etken.
Prokýratýranyń úılestirýimen júzege asyrylyp jatqan «Sanaly Urpaq» jobasy aıasynda uıymdasqan qylmysqa qarsy kúres bólimshesiniń qyzmetkerleri oqý oryndaryndaǵy bopsalaý faktilerin anyqtady.
- Atap aıtqanda, Pavlodar qalasynda eki oqýshy óz qatarlastarynan aqsha bopsalady degen kúdikke ilindi. Olar jábirlenýshilerden baǵaly zattaryn lombardqa ótkizip, túsken aqshany berýdi talap etken. Keıbir jaǵdaılarda qysym kórsetý úshin áshkereleıtin beınematerıaldar paıdalanylǵan. Al Ekibastuz qalasynda kolledjdiń kámeletke tolmaǵan stýdenti tanysymen birge 50 myń teńge bopsalady degen kúdikpen ustaldy. Kúdiktiler jábirlenýshini avtokólikpen alyp ketip, oǵan kúsh qoldanǵan, - dep habarlady óńirlik polıtsııa departamentinen.
Atalǵan eki derek boıynsha qylmystyq is qozǵaldy.
– Quqyq qorǵaý organdary ózge de yqtımal qatysýshylardy anyqtaý jumystaryn jalǵastyryp jatyr. Sondaı-aq qosymsha epızodtardyń bar-joǵy tekserilip jatyr. Kúdiktiler aqsha berý kezinde ustaldy, – dep habarlady Pavlodar oblysy Polıtsııa departamenti uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov.
Quqyq qorǵaý organdary jastar arasynda qylmystyq toptar qurý, qylmystyq yqpal ornatý jáne aqsha bopsalaý áreketteri qoldanystaǵy zańnama aıasynda qatań túrde joly kesiletinin atap ótti.
Eske sala keteıik, elimizde bopsalaý qylmysy 15% azaıdy.
