Pavlodarda stomatologııalyq em kezinde jaǵdaıy kúrt nasharlaǵan úsh jastaǵy bala jansaqtaý bóliminde jatyr
PAVLODAR. KAZINFORM — Pavlodarda stomatologııalyq em qabyldaý kezinde jaǵdaıy kúrt nasharlaǵan úsh jastaǵy qyz bala oblystyq balalar aýrýhanasynyń jansaqtaý bóliminde jatyr. Bul týraly oblystyq densaýlyq saqtaý basqarmasynan málimdedi.
Vedomstvonyń málimetinshe, 2026 jylǵy 21 qazanda saǵat 15:45–te qyz bala jedel medıtsınalyq járdem brıgadasymen Pavlodar oblystyq balalar aýrýhanasyna jetkizilgen. Naýqas birden jansaqtaý bólimshesine jatqyzylǵan.
— Qazirgi ýaqytta qyz bala ókpeni jasandy tynys aldyrý apparatyna qosylǵan, qarqyndy terapııa júrgizilip jatyr, — dep habarlady densaýlyq saqtaý basqarmasynan.
22 qazanda Ana men bala ulttyq ǵylymı ortalyǵynyń (UMC) jáne «Ulttyq ǵylymı kardıohırýrgııalyq ortalyq» AQ mamandarymen telemedıtsınalyq konsýltatsııa ótkizilgen. Onyń barysynda naýqasty emdeý taktıkasy men odan ári medıtsınalyq kómek kórsetý tásilderi kelisilgen.
Basqarmanyń habarlaýynsha, balanyń jaǵdaıy vedomstvo basshysynyń jeke baqylaýynda. Naýqastyń jaǵdaıyn baǵalaý jáne emdeý tıimdiligin baqylaý úshin oblystyq balalar aýrýhanasy dárigerleriniń qatysýymen kún saıyn pánaralyq konsılıýmdar ótkiziledi.
Áleýmettik jelide balanyń týysy oqıǵaǵa qatysty jazba jarııalady.
Áıel adamnyń aıtýynsha, Lermontov kóshesi, 100/2 mekenjaıyndaǵy stomatologııada tisin emdeý kezinde balanyń jaǵdaıy kúrt nasharlaǵan. Onyń sózinshe, bala esinen tanyp, tynys alýy buzylǵan. Týysy medıtsınalyq qyzmetkerlerdiń shuǵyl kómek kórsetýge áreket etpegenin jáne jedel járdem shaqyrý týraly ótinishke birden jaýap bermegenin alǵa tartady.
Jazba avtorynyń málimetinshe, jedel járdem kóliginde balanyń júregi toqtap, keıin oblystyq balalar aýrýhanasynda taǵy da júrek toqtaýy tirkelgen.
Qazirgi ýaqytta oqıǵanyń mán-jaıyn quqyq qorǵaý organdary anyqtap jatyr.
Densaýlyq saqtaý basqarmasynyń málimetinshe, tekserý nátıjeleri boıynsha oqıǵaǵa quqyqtyq baǵa beriledi.
Eske sala keteıik, Astanada dámhanada tamaqtanǵan eki bala aýrýhanaǵa tústi.
