Pavlodarda sóıleıtin sýretter kórmesi ótip jatyr

PAVLODAR. QazAqparat – Pavlodarda «sóıleıtin» sýretter kórmesi ashyldy. Qazaqstandyq sýretshi óz týyndylary arqyly qoǵamdaǵy ótkir máselelerdi kótergen, dep habarlaıdy QazAqparat Pavlodarnews.kz saıtyna silteme jasap.

Ańsaǵan Mustafa sýretterinde áleýmettik jelilerdiń ústemdigi, kúndelikti tártipsizdik, qaýip-qater, otbasylyq qarym-qatynas taqyryptaryn beınelegen. Kórmede onyń 50 eńbegi tur.

«Bul kórme qoǵamdaǵy máseleler jaıly sóıleıdi. Sýretterde túrli jaǵdaılar, onyń ishinde qoǵamǵa qaýip keltiretin jaǵdaılar beınelengen», - deıdi Pavlodar oblystyq óner murajaıy qorynyń basshysy Olga Pashko.

Sýretshi Ańsaǵan Mustafanyń aıtýynsha, bul kórme 15 jyl boıy álemdi sharlap, ondaǵan elge qoıylǵan.

«Kórme Perý, Frantsııa, Kosta-Rıka, Amerıka, Brazılııa, Ońtústik Koreıa elderiniń halqyna usynylǵan edi. Mysaly, Brazılııada da osyndaı máseleler bolýy múmkin dep oılamappyn. Bizdegi máseleler olarda da bar eken. Kórmede jumyssyz azamattardy, qarttar úıine tapsyrylatyn ájeler men atalardy kórýge bolady», - dedi sýretshi Ańsaǵan Mustafa.

Ol bolashaqta ekologııa jáne aýyz sý taqyrybynda sýretter salýdy josparlap otyr. Kórme 20 tamyzǵa deıin jalǵasady.