Pavlodarda sottalǵandardyń 75 paıyzy óndiris oryndarynda eńbek etip júr
PAVLODAR. KAZINFORM - Jazasyn ótep jatqan azamattardy jumyspen qamtý prokýratýranyń júıeli jumysyna aınalǵan. Oblys boıynsha 2300 sottalýshy bar.
Jergilikti túzeý mekemeleri men kolonııalarda jazasyn ótep jatqandardyń 75 %-y óndiris oryndarynda eńbek etýge múmkindik alǵan. Mamandardyń aıtýynsha, bul tártipti nyǵaıtyp, jaýapkershilikti arttyrýǵa yqpal etedi.
Óńirde sottalǵandardy qaıta áleýmettendirý jobasynyń júzege asyrylyp jatqanyna eki jyl ótti. Osy kezeń ishinde joba óziniń tıimdiligin dáleldegen.
- Birlesken kúsh-jigerdiń arqasynda 1200-den astam sottalýshyny jumyspen qamtydyq. Keleshekte óndiris aýqymyn keńeıtip, qosymsha jumys oryndaryn ashýǵa kúsh salamyz. Jergilikti atqarýshy organdarmen de tyǵyz baılanys ornaǵan. Pavlodardyń túzeý mekemelerinde jańa jumys oryndaryn ashý úshin kásipkerlermen 13 kelisimshart jasalǵan. Qosymsha tsehtar salýǵa daıyndyq júrip jatyr, - deıdi oblys prokýrorynyń orynbasary Erbol Ysqaqov.
Oblystyq qylmystyq-atqarý júıesi departamenti bastyǵynyń orynbasary Asqar Serǵazınniń aıtýynsha, oblys mekemelerinde 2300 adam jazasyn ótep jatyr.
«Sottalǵandardy jumyspen qamtý deńgeıin arttyrý – bizdiń negizgi maqsatymyz. Bul kórsetkishti shamamen 90 %-ǵa deıin jetkizýdi josparlap otyrmyz», - deıdi ol.
Máselen №46 túzeý mekemesinde tigin tsehtary, jıhaz, metall konstrýktsııalar jáne qurylys materıaldaryn óndirý ýchaskeleri jumys isteıdi. Eńbekaqy sottalǵandarǵa sot mindettemelerin oryndaýǵa múmkindik beredi. Jyl basynan beri olardyń shotyna talap-aryzdar men alımentterdi óteý úshin bes mıllıonnan astam teńge aýdarylǵan.
Eske sala keteıik, Pavlodarda túzeý mekemesiniń qyzmetkeri para alǵany úshin 6 jylǵa sottaldy.
