Pavlodarda sottalǵandar túrme shatyryndaǵy spýtnıktik ınternetti qoldanyp kelgen

PAVLODAR. KAZINFORM — Ol arqyly № 46 túzeý mekemesinde jazasyn ótep otyrǵandar ınternetke jáne kúzetshilerdiń beınekamerasyna qosylǵan.

Kolonııa ishinde call-ortalyq qurylyp, sottalýshylar zańsyz esirtki bıznesimen aınalysqan degen kúdik bar.

Oblys ortalyǵynda № 46 túzeý mekemesindegi eki qabatty ákimshilik ǵımarattyń tóbesinen sottalýshylar paıdalanyp kelgen ınternet qabyldaǵysh tabyldy. Ol arqyly jazasyn ótep otyrǵandar ınternetke qol jetkizip, uıaly baılanysty paıdalanǵan. Sondaı-aq call-ortalyq quryp, sol jerden zańsyz ınternet bıznesin basqarǵan degen kúdik bar. Tipti, sottalýshylar ol jerdegi kompıýterlik qurylǵylardyń kómegimen túrme kúzetiniń beınkamerasyna qosyla alǵan.

Bul aqparatty Pavlodar oblysy boıynsha qylmystyq-atqarý júıesi departamentiniń baspasóz qyzmeti rastady.

— Atalǵan derek boıynsha quzyrly organdarmen qylmystyq is qozǵaldy. Kolonııanyń jáne Qylmystyq atqarý-júıesi departamentiniń birqatar qyzmetkerleri jaýapkershilikke tartylyp, mekeme bastyǵy atqaryp otyrǵan laýazymynan bosatyldy. Qazir tergeý-tekserý sharalary júrip jatyr. Qylmystyq-atqarý júıesi komıteti zań buzýshylyqqa prıntsıpti ustanymyn bildiredi. Tergeý sharalaryna jan-jaqty kómek kórsetilýde, — dep habarlady óńirlik departamentten.

Eske sala keteıik, keshe sottalǵandardy azaptady dep aıyptalǵan túrmeniń 12 qyzmetkerine qatysty úkim shyqty.