Pavlodarda sottalǵan nashaqordyń isi boıynsha laýazymdy tulǵalar jazalanbaq
ASTANA. QazAqparat - Pavlodar qalasynyń № 2 soty qarýdy zańsyz alyp júrgeni jáne esirtki zatyn saqtaǵany úshin sottalǵan azamatty aqtap, qamaýdan bosatty, dep habarlaıdy QazAqparat Pavlodar oblystyq sotynyń baspasóz qyzmetine silteme jasap.
Sot Vıtalıı Mozjýhındi sýyq qarýdy zańsyz alyp júrgeni jáne asa iri mólsherde esirtki zatyn satý maqsatynsyz saqtaǵany úshin kináli dep tanyp, 3 jylǵa bas bostandyǵynan aıyrýǵa úkim shyǵarǵan bolatyn. Sondaı-aq, odan 693 074 teńge kólemindegi ótemaqy (saraptama ótkizýge baılanysty protsestik shyǵyndar) óndirilip alyndy. Bas bostandyǵynan aıyrý ornynda nashaqorlyqtan májbúrli túrde emdeý sharasy da taǵaıyndalǵan edi.
Pavlodar oblystyq sotynyń qylmystyq ister jónindegi sot alqasy apellıatsııalyq shaǵymy boıynsha isti qaıta qarap, aıyptaý úkimniń kúshin joıdy. Solaısha, ol tolyǵymen aqtalyp, qamaýdan bosatyldy. Apellıatsııalyq saty tergeý sýdıasynyń sanktsııasynsyz sottalýshyǵa jeke tintý júrgizilgeni, sýyq qarýdy saqtaǵany týraly kiná taǵylǵany, sonyń saldarynan onyń qylmystyq jaýapkershilikke zańsyz tartylǵany sekildi óreskel buzýshylyqtardy anyqtady.
Sot oblystaǵy ishki ister departamenti men prokýratýranyń atyna V.Mozjýhındi qylmystyq jaýapkershilikke tartýǵa ákelip soqtyrǵan osy is boıynsha jekeshe qaýlylar shyǵaryp, kináli laýazymdy tulǵalarǵa tıisti sharalar qabyldaýdy talap etti.
