Pavlodarda sotqarlar jeti jasar balanyń tilin qaıshymen tilgilegen
PAVLODAR. KAZINFORM - Japa shekken bala qazirgi kúni oblystyq balalar aýrýhanasyna jatqyzylǵan. Dárigerler onyń jaǵdaıy ortasha aýyrlyq dárejesinde ekenin habarlady.
Oblys ortalyǵynda jastary shamamen 10-dardaǵy eki bala 7 jasar jetkinshekke shabýyldap, tilin qaıshymen keskilep ketken.
Bul týraly japa shekken balanyń anasy áleýmettik jelide shaǵymdandy.
Onyń aıtýynsha, oqıǵa 9 jeltoqsan kúni Aımanov kóshesi, 50-úı mekenjaıynda kúndiz saǵat 13.00 shamasynda bolǵan.
- Ulyma jas shamalary 10-daǵy eki er bala shabýyl jasaǵan. Jerge jyǵyp, tepkiniń astyna alǵan. Qaıshymen tilin tilgilegen. Qazirgi ýaqytta ulym oblystyq balalar aýrýhanasynyń travmatologııa bólimshesinde mı shaıqalý dıagnozymen jatyr. Sizderden ótinetinim, oqıǵa kezinde bul aýmaqtan ótip bara jatyp jaǵdaıdy kórgen kýágerler bolsa, habarlasyńyzdar, - dep jazdy anasy.
Óńirlik balalar aýrýhanasynyń travmatolog-dárigeri Musaıyp Tóleýbaevtyń aıtýynsha, balanyń jaǵdaıy ortasha aýyrlyq dárejesinde. Balany tekserý kezinde jabyq bas súıek-mı jaraqaty belgileri, joǵarǵy erni men tilinde jaraqattar anyqtalǵan.
- 2018 jylǵy týǵan er bala qazirgi sátte eshbir otany qajet etpeıdi. Oǵan konservatıvtik em-dom taǵaıyndaldy. Ernindegi jáne tilindegi jaraqattar qaýipti emes jáne atalǵan aǵzalardyń odan ári qabiletin joǵaltýyna aparyp soqtyrmaıdy, - deıdi ol.
Oblystyq polıtsııa departamenti kámeletke tolmaǵanǵa qasaqana jeńil dene jaraqatyn salý deregi boıynsha qylmystyq is qozǵady.
- Oqıǵaǵa qatysy bar kámeletke tolmaǵandardy anyqtaý jáne olardy ustaýǵa baǵyttalǵan qajetti sharalar júrgizilýde. Qylmystyq is aıasynda olardyń zańdy ókilderiniń áreketterine quqyqtyq baǵa beriledi. Sondaı-aq kámeletke tolmaǵandardyń minez-qulqy olardyń quqyqtaryn qorǵaý jónindegi jáne kámeletke tolmaǵandar isteri jónindegi komıssııada qaralyp, esepke qoıý máselesi sheshiledi. Oqıǵanyń mán-jaılary men sebepteri tergeý barysynda anyqtalatyn bolady, - dep málimdedi departamentten.
Al Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova bolǵan jaǵdaıdyń mán-jaıyn anyqtap, qajetti kómek kórsetý úshin balanyń anasymen baılanysqa shyqqanyn habarlady. Balaǵa júıeli túrde kómek kórsetý úshin Psıhologııalyq qoldaý ortalyǵyna tapsyrma berilgen. Qazirgi ýaqytta jaǵdaı óńirlik bala quqyqtary jónindegi ýákildiń baqylaýynda.
Eske sala keteıik, byltyr Pavlodarda jetim qyzdardy tósek qatynasyna tartýdyń 8 deregi tirkelgen.