Pavlodarda sot oryndaýshylary kópbalalaly ananyń aqshasyn alyp qoımaqshy bolǵan

PAVLODAR. KAZINFORM — Jeke sot oryndaýshylary otbasynyń «Otbasy bankinde» jınap qoıǵan aqshasyn qaryz retinde óndirýdi uıǵarǵan. Bul jınaqty otbasy «Baqytty otbasy» ıpotekalyq baǵdarlamasy úshin jınaǵan, qarajat banktiń kepilinde bolǵan.

Pavlodar oblystyq sotynyń ákimshilik ister jónindegi sot alqasy jeke sot oryndaýshylarynyń is-áreketin zańsyz dep taný, óndirip alynǵan aqshalaı qarajatty qaıtarý týraly talap qoıý boıynsha qanaǵattandyrylǵan sot sheshimine túsken apellıatsııalyq shaǵym boıynsha isti qarady.

Sot alqasy talap qoıýshynyń «Otbasy banki» AQ-daǵy shottaryna tyıym salyp, qarajatty esepten shyǵarǵanyn anyqtady. Al álgi qarajat kópbalaly ananyń «Baqytty otbasy» memlekettik jobasy aıasynda jınaqtalǵan jáne bank kepiline salynǵan turǵyn úı qurylys jınaqtary bolǵan.

— Buǵan qosa, jınaq shoty neke kezinde ashylǵany anyqtaldy. Endeshe ol erli-zaıyptylardyń ortaq menshigi bolyp sanalady. Sondyqtan óndirip alý atqarýshylyq is júrgizýge qatysýshy bolyp tabylmaǵan tulǵanyń da quqyqtaryn qozǵady. Sot oryndaýshylary salynǵan somalardyń maqsatyn tekserýge jáne kepil ustaýshy men teń qaryz alýshynyń quqyqtaryn saqtaýǵa mindetti edi, — dep habarlady oblystyq sottan.

Saıyp kelgende sot oryndaýshylarynyń áreketteri «Atqarýshylyq is júrgizý jáne sot oryndaýshylarynyń mártebesi týraly» jáne Joǵarǵy Sottyń normatıvtik qaýlysynyń talaptaryn buzǵan.

Birinshi satydaǵy sottyń qaýlysy ózgerissiz, jaýapkerlerdiń apellıatsııalyq shaǵymy qanaǵattandyrýsyz qaldyryldy. Qaýly zańdy kúshine endi.

Sondaı-aq, sot alqasy jeke sot oryndaýshylarynyń tarapynan jiberilgen zań buzý boıynsha Pavlodar oblysy boıynsha jeke sot oryndaýshylarynyń óńirlik palatasynyń basshylyǵyna tıisti sharalar qabyldaý jáne aldaǵy ýaqytta mundaı faktilerge jol bermeý maqsatynda eki jeke uıǵarym shyǵardy.

Eske sala keteıik, Aqmola oblysynda naýqastyń 1,5 mln teńgesin aldap alǵan dáriger sottaldy.