Pavlodarda soǵys bitimgerlerine arnalǵan alǵashqy eskertkish qoıyldy

ASTANA. QazAqparat - Pavlodarda alǵashqy soǵys bitimgerlerine arnalǵan eskertkish qoıyldy. Saltanatty sharaǵa jergilikti soǵys jáne soǵys qaqtyǵystarynyń ardagerleri, qala turǵyndary qatysty, dep habarlaıdy pavlodarnews.kz.

«Bitimger» eskertkish belgisi «Qazaqstannyń alǵashqy bitimgerleri» saıabaǵynda ornalasqan. Eskertkishtiń avtory - aqsýlyq jas músinshi Igor Isakov.

Pavlodar qalasy ákiminiń orynbasary Saıan Muqanov ornatylǵan eskertkishtiń, oǵan qosa, ardagerlerdiń jastarǵa áskerı-patrıottyq tárbıe berýde atqaryp jatqan eńbekteriniń mańyzdy ekenin atap ótti.

- Búgingi shara búkil Qazaqstan úshin mańyzdy bolyp sanalady. Óıtkeni, bul elimizdegi ózimizdiń kúshimizben salynǵan alǵashqy eskertkish, - deıdi jergilikti soǵys ardagerleri jáne tájik-aýǵan shekaralaryndaǵy qaqtyǵysqa qatysýshylar odaǵynyń tóraǵasy Gennadıı Kozak.

Eskertkishti ornatý ıdeıasyn «jergilikti soǵys ardagerleri jáne tájik-aýǵan shekaralaryndaǵy qaqtyǵysqa qatysýshylar odaǵy» qoǵamdyq birlestigi músheleri usynǵan bolatyn.

- Biz buny tórt jyl kúttik. Eki jyl buryn bizge saıabaqtan oryn bólip berdi. Osy orynda atalmysh eskertkish ornatylatyny jóninde jazylǵan tas qoıyldy. Sodan eki jyl ótkennen keıin maqsatymyzǵa jettik, - deıdi Gennadıı Kozak.

1993 jyldyń shildesinen 2001 jyldyń aqpanyna deıin 10 myńnan astam qazaqstandyq bitimgerler TMD-nyń ońtústik shekaralaryn qorǵady. Qaza bolǵandar arasynda Pavlodar oblysynyń úsh turǵyny Qanat Ydyryshev, Amangeldi Jumabekov, Valerıı Sofronıı bar.