Pavlodarda smartfon «arqalaǵan» dron túrme ishine kelip qondy
PAVLODAR. QazAqparat - Pavlodarda dronnyń kómegimen túrmege telefon kirgizbek boldy, dep habarlaıdy QazAqparat polisia.kz resýrsyna silteme jasap.
Keshe túnde Pavlodar oblysyndaǵy qaýipsizdigi ortasha kolonııanyń qyzmetkerleri ushqyshsyz ushatyn apparatty taýyp aldy. Ol kolonııanyń aýmaǵyna kelip qonǵan. Dronǵa polıetılen paket bekitilgen eken. Onyń ishinde eki uıaly telefon, eki sım-karta jáne telefondy qýattaıtyn apparat bar edi.
«Qazaqstannyń túrme júıesinde zańsyz zat kirgizgen drondy ustap alý alǵash ret bolyp otyr. Biz buǵan deıin dronnyń túrme ústimen ushyp ótkenin ǵana tirkegenbiz. Drondy polıtsııaǵa berdik, onyń ıesi men júkti berip jibergen adam anyqtalyp jatyr. Jalpy, bıyl túrmege zańsyz kirgizýge tyrysqan 1600 telefon, 24 lıtr spırttik ishimdik jáne 7 kelige jýyq esirtkini tárkiledik. Olardy kóp jaǵdaıda sálem-saýqattyń ishine salyp jiberedi nemese qabyrǵanyń ar jaǵynan ishke qaraı laqtyrady. Osyndaı áreketi úshin 153 adam ákimshilik jaýapkershilikke tartylǵan, qalǵanyna qatysty is áli qaralyp jatyr», - deıdi Qylmystyq atqarý júıesi komıteti tóraǵasynyń mindetin atqarýshy Esqalı Salamatov.
Aıta keteıik, keshe Almaty oblysynyń Zarechnyı aýylynda 5 shólmek alkogoldi kolonııa aýmaǵyna laqtyrmaq bolǵan adam ustaldy. Ol buryn ózi de sottalǵan eken.
