Pavlodarda shybyn-shirkeıdi ýlaýǵa ushatyn apparattar qoldanylady
PAVLODAR. QazAqparat - Masalar men shybyn-shirkeıge qarsy dezınsektsııalyq is-sharalardy júrgizýge oblystyq bıýdjetten 602,3 mıllıon teńge bólý josparlanǵan, dep habarlaıdy QazAqparat pavlodarnews.kz silteme jasap.
Bul týraly «Dostyq» úıinde uıymdastyrylǵan qoǵamdyq keńes tóralqasynyń keńeıtilgen otyrysynda málim boldy.
- Ótken jyldyń qarasha aıynda múddeli ókildermen, sondaı-aq osy saladaǵy ǵylymı ókildermen 2020 jyly dezınsektsııalyq is-sharalardy ótkizýdiń tehnıkalyq erekshelikterin talqylaý boıynsha keńes ótkizildi, - deıdi oblystyq energetıka jáne turǵyn úı-kommýnaldyq sharýashylyq basqarmasynyń basshysy Murat Abulqalyqov. - Keńes qorytyndysy boıynsha aǵymdaǵy jyly dezınsektsııalyq is-sharalardy júrgizýge quzyretti memlekettik organdar, qoǵamdyq birlestikter, sondaı-aq osy salada jumys isteıtin ǵylymı qyzmetkerlermen birlesip, tehnıkalyq spetsıfıkatsııalar ázirlendi jáne kelisildi.
Sonymen qatar, basqarma basshysynyń aıtýynsha, qazirgi ýaqytta taýarlardyń, jumystardyń jáne qyzmetterdiń esebi men konkýrstyq qujattamanyń jobasy daıyn.
- Atap aıtqanda, jókeler men masalardyń dernásilderine qarsy 199 484 tonna bıologııalyq preparat satyp alý, - deıdi Murat Abulqalyqov. – Oǵan qosa, ımago shybyn-shirkeıine qarsy oblys ortalyǵyn kedergimen óńdeý úshin 1 992 tonna hımııalyq preparat satyp alý. Pavlodar jáne Aqsý qalasy aýdanyndaǵy masalar dernásilderine qarsy 17 550 gektar jaıylma ýchaskelerdi avıaóńdeý jáne Pavlodar qalasynyń saıabaqtary men skverlerdiń ımago shybyn-shirkeıine qarsy tosqaýyl qoıý josparda bar.
Sondaı-aq 1 130,6 km aýmaqty qamtıtyn Pavlodar, Aqsý qalalary men Aqtoǵaı, Jelezın, Ertis, Tereńkól, Aqqýly, Maı, Pavlodar jeti jaǵalaý aýdandarynda barjadan bıologııalyq preparatty aǵyzý jolymen Ertis ózenin eki-tórt ret óńdeý jobaǵa engizildi.
Aıta keterligi, ótken jyldardan ózgeshe bıyl asa núkteli jáne tıimdi avıa óńdeý úshin gabarıtti motorly ushý apparattaryn qoldaný josparlanyp otyr.
