Pavlodarda shıeniń kelisin 11 myń teńgeden satyp jatyr
ASTANA. QazAqparat - Pavlodarlyq dúkenderde kelisi 11 myń teńgeden saýdalanyp jatqan shıeniń baǵasyn áleýmettik jeliler arqyly turǵyndar qyzý talqylap, túrli pikir bildirýde, dep habarlaıdy pavlodarnews.kz.
Kópshiliktiń tań qalysyn týdyrǵan atalmysh jemis túriniń baǵasyna baılanysty qandaı da bir málimet alý maqsatynda oblystyq kásipkerlik, saýda jáne týrızm basqarmasyna telefon shalyp, tómendegideı jaýap aldyq: - Bul qysqy jemis. Onyń bizdiń óńirge qaıdan ákelinetini belgisiz. Áleýmettik mańyzy bar azyq-túlik qataryna jatpaıdy. Biz úshin qazirgi tańda kartoptyń baǵasyn bir deńgeıde ustap turý mańyzdy. Qaltasyna qaraı kósiletin jandar ǵana satyp ala alady. Degenmen, suranys bolmasa saýdalanbas edi. Jalpy, qulpynaı men tańqýraı sııaqty jemister óte az kólemde jetkiziledi. Kóbinese, meıramhanalar korporatıvtik keshter úshin dastarhandaǵy asty bezendirýge satyp alady. Al, biz sııaqty qarapaıym turǵyndardyń qoly jete qoımas, - dep jaýap berdi basqarmada. Qalalyq kásipkerlik jáne aýyl sharýashylyǵy bólimi tutynýshy sektorynyń meńgerýshisi Arman Asıpovtyń aıtýynsha, qala boıynsha shıe tek úsh-tórt dúkende ǵana saýdalanady. Máselen, «Madııar» dúkeninde bul jemistiń kelisi 9000 teńge turady.
