Pavlodarda shybyn-shirkeıge qarsy óńdeý jumystary qashan bastalady
PAVLODAR. KAZINFORM — Ertis ózenine sý jiberý sharalary shamamen 15-16 sáýirde júrgizilýi múmkin. Onyń sońyn ala óńirdegi 59 eldi mekenniń aınalasynda «Baktıtsıd» preparaty shashyla bastaıdy.
Buǵan deıin habarlaǵanymyzdaı, bıyl Pavlodar oblysynda jalpy aýmaǵy 127 myń gektar alqapty shybyn-shirkeıge qarsy óńdeý josparlanyp otyr. https://kaz.inform.kz/news/pavlodar-oblisinda-shibin-shrkeyge-karsi-himiyalik-ondeletn-aumak-kolem-ulgayadi-11db93/
Jándikterdiń dernásilderin joıýǵa arnalǵan «Baktıtsıd» preparatynyń alǵashqy 60 tonnasy oblys ortalyǵyna qazirden jetkizilip qoıdy. Ertis ózeninde sý jiberý sharalary aıaqtalǵan soń áýeden jáne jerden óńdeý sharalary bastalady.
Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaeva «Baktıtsıd» bıologııalyq preparaty bizdiń aımaqta 10 jyldaı qoldanylyp kele jatqanyn atap ótti. Shybyn-shirkeıdiń preparatqa degen beıimdelýi baıqalmaıdy, al dáriniń qorshaǵan ortaǵa tıgizetin zııany eleýsiz. Ertis ózenin jaǵalaı ornalasqan eldi mekender mańaıyn óńdeý sharalaryna 157 tonna preparat qajet.
Shirkeıdiń popýlıatsııasyn birjola qurtyp jiberý degen oıǵa syımaıtyn dúnıe. Bıologııa ǵylymdarynyń doktory, professor Qanat Ahmetov «Baktıtsıd» dep atalatyn mıkrobıologııalyq preparat dernásilder óz betimen qorektene alatyn damý deńgeıinde ǵana nátıjeli ekenin aıtady. Mamandar dernásilderdiń damýyn baqylap otyrady da, ýaqyty jetkende «Baktıtsıdti» shashyp, olardy joıady. Bekitilgen standartqa súıensek, eger álgi bıologııalyq preparat shashylǵan jerlerdegi qansorǵyshtardyń kemi 80 paıyzy qyrylsa, óńdeýdiń nátıjeli júrgizilgenin bildiredi. Al qanattanyp shyqqan shirkeılerdi joıý úshin kezekte hımııalyq, barerlik óńdeý kútip turady. Ol eldi mekenderdiń aınalasyndaǵy shóptesin jerlerde, aǵash toǵaılarynda júrgiziledi.
Ǵalymnyń pikirinshe, jándikterdi óńdeý arqyly joıý — shybyn-shirkeımen kúrestiń jalǵyz ári tıimdi joly. Sońǵy 25 jyldaǵy zertteýler muny aıqyn dáleldep otyr.
— Bıyl qysta óńirde qar az boldy. Óńdeletin aýmaqtar ulǵaıǵanymen, shybyn-shirkeı sany sonshalyqty kóp bolady dep aıta almaımyn. Biz 2000 jyldan beri sary masa men shirkeıdi zerttep kelemiz. Alǵashqy jyldary bir detsımetr aýmaqta shirkeıdiń 6-7 myń danaǵa deıin dernásili kezdesetin. Óńdeý jumystary jyl saıyn júıeli júrgizilip kele jatqanynyń nátıjesi bolýy kerek, qazir bul norma 1-1,5 myń danaǵa deıin tómendegen. Negizi dernásil damý barysynda tórt márte túleıdi, sodan aman ótse ushyp ketedi, - deıdi ol.
Bıyl dezınsektsııalyq sharalardy «V ı K LTD» JShS júrgizetini belgili boldy. «Bıosfera» JShS ǵylymı súıemeldeý jasaıdy. Jalpy shybyn-shirkeıdi ýlaý jumystaryna bıýdjetten 7,8 mlrd teńge qarajat bólingen.
