Pavlodarda shybyn-shirkeı qaptap, aýyl turǵyndarynyń qutyn qashyrýda
PAVLODAR. KAZINFORM — Mamyr aıynyń jaýyn-shashyndy ári salqyn bolýynan qansorǵyshtardyń jappaı qanattanýy baıqala qoımaǵan edi. Maýsym aıynyń alǵashqy aptasynda kún ysyp, shirkeı men sary masa qaptap shyǵa keldi.
Shybyn-shirkeıdiń shabýylyna, ásirese Ertis ózenin boılaı ornalasqan Pavlodar, Aqtoǵaı, Ertis, Tereńkól, Jelezın aýdandarynyń halqy men tórt túligi ushyrap jatyr.
Qansorǵyshtar ózen jaıylmasyndaǵy taıaz sýdan qanattanyp, túngi ýaqytta aýyldarda qaptap ketedi.
Ertis pen Jelezın aýdandarynyń turǵyndary úımelep ketken shirkeı men sary masaǵa qatysty shaǵymdaryn jetkizdi.
Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaeva bir ǵana Ertis aýdanynda dezınsektsııalyq jumystar 10 myń gektar aýmaqta júrgiziletinin habarlady.
— Jospar boıynsha aımaqtar áýeden óńdeledi. Sý áli tolyǵymen qaıtpaǵan. Byltyrǵy jylǵa qaraǵanda jaıylmany sý basý deńgeıi 1,5 ese kóp, ásirese soltústik óńirlerde ol 90 paıyzǵa jetip tur. Sondyqtan shirkeılerdiń jańa toby kún saıyn ushyp shyǵady. Biz áýeden óńdeý taktıkasyn ózgertemiz. Ǵylymı toptyń usynysymen dezınsektsııalaýdyń ekinshi jáne úshinshi kezeńi kelesi aptada bastalady, -dedi ol.
Al Pavlodar oblysynyń ákimi Asaıyn Baıhanov keler jyly Ertis pen Jelezın aýdandarynda shybyn-shirkeıge qarsy óńdeletin aýmaqtardy ulǵaıtý kerek degen pikirde.
Eske sala keteıik, bıyl Pavlodar oblysynda jalpy aýmaǵy 127 myń gektar alqapty shybyn-shirkeıge qarsy óńdeý josparlanyp otyr. Bul ótken jylmen salystyrǵanda 55,5 myń gektarǵa kóp.
